Вазирлар Маҳкамасининг 30.09.2022 йилдаги «Узум етиштирувчилар ва вино маҳсулотини ишлаб чиқарувчилар республика кўрик-танловини ўтказиш тартиби тўғрисидаги низомни тасдиқлаш ҳақида»ги 557-сон қарори қабул қилинди.
Ҳужжат Президентнинг 28.07.2021 йилдаги «Узумчиликни ривожлантиришда кластер тизимини жорий этиш, соҳага илғор технологияларни жалб қилишни давлат томонидан қўллаб-қувватлашнинг қўшимча чора-тадбирлари тўғрисида»ги ПҚ-5200-сон қарорига мувофиқ ишлаб чиқилган.
2023 йилдан бошлаб ҳар икки йилда бир марта сентябрь ойида узумчилик йўналишида қуйидаги номинациялар бўйича ўтказиладиган республика кўрик-танлови таъсис этилади:
- «Энг яхши узум нави»,
- «Энг яхши маҳаллий узум нави»,
- «Энг яхши вино маҳсулоти».
Узум етиштирувчилар ва вино маҳсулотини ишлаб чиқарувчилар республика кўрик-танловини ўтказиш тартиби тўғрисидаги низом тасдиқланди. У билан қуйидагилар бўйича тартиб белгиланди:
- кўрик-танловни ўтказиш бўйича ташкилий қўмита фаолиятини ташкил этиш;
- кўрик-танлов иштирокчиларини танлаш (улар узум етиштириш ва вино маҳсулоти ишлаб чиқариш билан шуғулланувчи юридик шахслар бўлиши мумкин);
- кўрик-танлов иштирокчиларини баҳолаш, ғолиб ва совриндорларни мукофотлаш.
Кўрик-танловнинг ғолибларини пул мукофотлари ва бошқа эсдалик совғалари билан тақдирлаш Алкоголь ва тамаки бозорини тартибга солиш ҳамда виночиликни ривожлантириш агентлиги, Маҳалла ва нуронийларни қўллаб-қувватлаш вазирлиги, Қишлоқ хўжаллиги вазирлиги, Ўзбекистон фермер, деҳқон хўжаликлари ва томорқа ер эгалари кенгашининг бюджетдан ташқари маблағлари ҳисобидан молиялаштирилади.
Мукофотлар қуйидаги тарзда тақсимланади:
- 1-ўрин – 100 БҲМ;
- 2-ўрин – 75 БҲМ;
- 3-ўрин – 50 БҲМ.
Ҳужжат Қонун ҳужжатлари миллий маълумотлар базасида эълон қилинган ва 30.09.2022 йилдан кучга кирган.
Лола Абдуазимова.
