Яқин ва узоқ муддатда кутилаётган об-ҳаво маълумоти, дарёлар сув сатҳи ҳамда иқлим ўзгаришини олдиндан аниқлаш Ўзбекистон иқтисодиётини янада ривожлантиришнинг муҳим шартларидан биридир.
2012 йил 21 мартда Ўзбекистон Республикаси Президентининг “Замонавий ахборот-коммуникация технологияларини янада жорий этиш ва ривожлантириш чора-тадбирлари тўғрисида”ги қарори эълон қилинган эди.
Вазирлар Маҳкамаси ҳузуридаги Гидрометеорология хизмати маркази – «Ўзгидромет» замонавий ахборот-коммуникация технологиялари ва гидрометеорология ускуналаридан кенг фойдаланиб келмоқда.
Жумладан, «Ўзгидромет» кузатув тармоғини кенгайтириш имконини берадиган автоматлаштирилган замонавий метеорология станциялари ташкил этилмоқда.
Яқинда кузатувлар давомида олинган ахборотга ишлов беришда кўплаб вазифаларни бажаришга мўлжалланган электрон метеорологик мажмуа ишга туширилди. Оптик толали ва йўлдош алоқа каналлари орқали ахборот-коммуникация технологиялари тармоқлари имкониятларидан самарали фойдаланишга асосланган бу мажмуа бутун дунёдан олинадиган турли гидрометеорология маълумотларини «Ўзгидромет» марказига етказиб беради.
Шунингдек, бир қанча геостационар ва қутб-орбитал метеорологик йўлдошлар ахборотини тезкор қабул қилиш воситалари ишга туширилган. Йўлдош маълумотларига ишлов беришнинг замонавий тизимлари ҳам жорий этилган бўлиб, бу турли метеорологик ҳамда бошқа вазифаларни тезкор ҳал этишга ёрдам бериб келмоқда.
Замонавий ахборот-коммуникация технологияларини қўллаш мамлакатимизда гидрометеорология маълумотларини тезкор тарқатиш ва улардан фойдаланиш имконини беради. Айни пайтда «Ўзгидромет» марказида олти кунга мўлжалланган ўрта муддатли об-ҳаво маълумотлари тузилмоқда.
Сўнгги русумдаги ускуна ва ахборот-коммуникация технологияларининг жорий этилаётгани қисқа ва узоқ муддатда об-ҳаво ҳамда иқлим ўзгаришини тезкор аниқлаш имконини беради. Бу эса Ўзбекистон иқтисодиётининг барча соҳаларини ривожлантиришга ўз таъсирини кўрсатиши шубҳасиз.
