Олий Мажлис Сенати Кенгашининг мажлисида Олий Мажлис Сенатининг йигирма тўртинчи ялпи мажлисини 30 ноябрь куни Тошкент шаҳрида чақириш тўғрисида қарор қабул қилинди.
Мажлисда даставвал мамлакатимиз тарихида илк бор қабул қилинган «2020 йил учун Ўзбекистон Республикасининг Давлат бюджети тўғрисида»ги Қонун муҳокама қилинади (батафсил бу ерда).
Шунингдек, «Ўзбекистон Республикаси Вазирлар Маҳкамаси тўғрисида»ги (янги таҳрирдаги), «Волонтёрлик фаолияти тўғрисида»ги, «Касаба уюшмалари тўғрисида»ги, «1993 йил 22 январдаги Фуқаролик, оилавий ва жиноят ишлари бўйича ҳуқуқий ёрдам ҳамда ҳуқуқий муносабатлар тўғрисидаги Конвенцияга доир Баённомани (Москва, 1997 йил 28 март) ратификация қилиш ҳақида»ги қонунлар кўриб чиқилади.
Кун тартиби доирасида «Фаол инвестициялар ва ижтимоий ривожланиш йили» Давлат дастурининг 2019 йил учинчи чорагидаги ижроси юзасидан Вазирлар Маҳкамасининг ҳисоботи эшитилади. Сенаторлар тадбиркорлик субъектларини тугатиш тартиби такомиллаштирилиши, бола ҳуқуқларининг кафолатлари янада кучайтирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритишга қаратилган қонунларни кўриб чиқадилар.
Самарқанд шаҳри ва Самарқанд тумани чегараларини ўзгартириш, Вазирлар Маҳкамасига божхона органлари томонидан қонун ҳужжатларининг ижро этилиши ҳолати, арзон уй-жой қурилиши, газ ва электр таъминоти билан боғлиқ парламент сўровларини юбориш тўғрисидаги масалалар кўриб чиқилиши режалаштирилмоқда.
