Давлат солиқ қўмитаси ташқи иқтисодий фаолият (ТИФ) иштирокчилари экспорт-импорт контрактларини бажаришни кечиктирганда жарималар пасайтирилишини ёқлаб чиқди. Президент фармони лойиҳаси ҚҲТБТ порталида жойлаштирилган.
Рухсат этилган кечиктириш муддатлари оширилади
Шуни эслатиб ўтамизки, Экспорт-импорт операциялари бўйича валюта назорати тўғрисида низомга (20.04.1994 йилдаги ПФ–837-сон Фармонга илова) мувофиқ, ТИФ иштирокчилари 2 та алоҳида ҳуқуқбузарлик учун жарима тўлайдилар:
- чет эллардан хорижий валютадаги тушумнинг келиб тушиши муддатларини 30 банк кунидан кўпроқ муддатда (кичик бизнес ва хусусий тадбиркорлик субъектлари учун – 60 банк кунида) кечиктиришга йўл қўйган экспортчилар белгиланган муддатлар тугагандан сўнг;
- товарларнинг Ўзбекистон ҳудудига олиб кирилишини ва уларнинг «эркин муомалага чиқариш» режимида расмийлаштирилишини, ишлар ва хизматлар кўрсатиш 30 банк кунидан кўпроқ муддатда (кичик бизнес ва хусусий тадбиркорлик субъектлари учун – 60 банк кунида) бажарилишини таъминламаган импортчилар белгиланган муддатлар тугагандан сўнг.
Кўриниб турганидек, экспортчи ва импортчилар учун рухсат этилган кечиктириш муддатлари бир хил (қонун ҳужжатларида белгиланган ва контрактда акс эттириладиган ҳақ тўлаш ва етказиб беришнинг белгиланган муддатлари билан чалкаштирманг). Рухсат этилган кечиктириш муддатларини 45 банк куни эмас, балки календарь кунигача (кичик бизнес ва хусусий тадбиркорлик субъектлари учун – 90 кунгача) ошириш таклиф этилмоқда.
Бунда кичик бизнес, хусусий тадбиркорлик субъектлари ва фермер хўжаликлари сирасидан бўлган экспортчилар учун валюта тушуми келиб тушиши ёки товарларни орқага қайтаришнинг белгиланган муддатлари ўзгаради. У 180 кундан 120 кунгача қисқаради (8.08.2013 йилдаги ПҚ–2022-сон қарорга қаранг).
Камроқ муддат кечиктирганлик учун – камроқ жарималар
Жарима миқдори кечиктириш муддатига боғлиқ:
- белгиланган муддатлардан 180 кунгача кечиктирганда – келиб тушмаган валюта маблағлари суммасининг 10%и эквивалентида;
- белгиланган муддатлардан 180 кундан 365 кунгача кечиктирганда – келиб тушмаган валюта маблағлари суммасининг қўшимча 20%и эквивалентида;
- белгиланган муддатлардан 365 кундан ортиқ кечиктирганда – келиб тушмаган валюта маблағлари суммасининг қўшимча 70%и эквивалентида.
Регулятор импортчилар учун жарима миқдори «эркин муомалага чиқариш» режимида расмийлаштирилмаган товарлар (бажарилмаган ишлар, кўрсатилмаган хизматлар) қийматидан ҳисоблаб чиқарилиши хусусида аниқлик киритишга қарор қилди. Зеро жарима миқдори келиб тушмаган валюта маблағлари суммасига қараб белгиланган бўлса, демак, импортчи учун аниқ жарима йўқ. Сабаби импорт битимларда валюта Ўзбекистонга келиб тушиши эмас, аксинча, кетиши керак.
Иккинчидан, жарималар миқдорларини қайта тақсимлаш режалаштирилмоқда. 365 кундан ортиқ кечиктирилганда, илгаригидек, умуман олганда 100% дебиторлик қарзи жарима сифатида ундирилади. Бироқ мажбурият 180 кунда бажарилишига улгурсалар, 10% эмас, балки 5% тўлашга тўғри келади. Бир йилгача кечиктирганда – 20% эмас, балки 10% тўланади.
Лойиҳа ўзгартирилиши, унга қўшимча киритилиши ёки рад этилиши мумкин.
Самир Латипов.
