Давлат хизматлари агентлиги Вазирлар Маҳкамасининг қарори лойиҳасини ишлаб чиқди ва муҳокама учун жойлаштирди, унда эски намунадаги ҳайдовчилик гувоҳномасини алмаштириш муддатини узайтириш таклиф қилинмоқда.
Амалдаги тартибга асосан ( “Миллий ҳайдовчилик гувоҳномасининг ҳамда автомототранспорт воситаси рўйхатдан ўтказилганлиги тўғрисидаги гувоҳноманинг янги намуналарини жорий этиш чора-тадбирлари тўғрисида” 2017 йил 2 мартдаги 116-сон ВМҚ) эски намунадаги ҳайдовчилик гувоҳномалари янгиларига 2021 йил якунига қадар алмаштирилиши керак.
Лойиҳа билан ушбу муддатни ҳайдовчилик гувоҳномалари берилган санасига мувофиқ ҳолда табақалаштирилган тарзда уч ойдан бир йилгача 2022 йил 31 декабрга қадар узайтириш таклиф қилинмоқда.
Ҳайдовчилик гувоҳномалари берилган санани ҳисобга олган ҳолда, улар ҳақиқий эмас деб ҳисобланадиган муддат кўрсатилиб, уларни алмаштириш жадвали белгиланмоқда:
- 2010 йилгача бўлган даврда берилганлари – 2022 йил 1 апрелдан;
- 2010 – 2012 йилларда берилганлари – 2022 йил 1 июлдан;
- 2013 – 2015 йилларда берилганлари – 2022 йил 1 октябрдан;
- 2015 йилдан кейинги кейин берилганлари – 2023 йил 1 январдан бошлаб.
Лойиҳа ўзгартирилиши, унга қўшимча киритилиши ёки рад этилиши мумкин.
Лола Абдуазимова.
