Соат 21:00 дан 9:00 гача алкоголь сотишни тақиқлашлари мумкин

ҚҲТБТ порталида алкоголли маҳсулотлар билан чакана савдо қилишни тартибга солишга йўналтирилган ҳукумат қарори лойиҳаси муҳокама қилинмоқда.  

Лойиҳа билан қуйидаги чора-тадбирлар таклиф этилмоқда.

Биринчидан, савдо объектлари ва умумий овқатланиш корхоналарида соат 21:00 дан 9:00 га қадар алкоголли маҳсулотларни сотишга йўл қўймаслик.

Иккинчидан, алкоголли маҳсулотларни қуйиб савдо қилишни фақат умумий овқатланиш корхоналарида алкоголли маҳсулотлар билан чакана савдо қилиш ҳуқуқини берадиган рухсат гувоҳномаси асосида амалга ошириш.

Учинчидан, кўнгилочар савдо объектлари ва умумий овқатланиш корхоналарида хизмат кўрсатишни соат 23:00 дан бошлаб тўхтатиш. Тошкент шаҳрининг бошқарув тизимини тубдан ислоҳ қилиш бўйича «йўл харитаси»да (18.08.2018 йилдаги ПФ–5515-сон) умумий овқатланиш ва савдо шохобчаларига соат 23:00 дан кейин алоҳида ойлик ҳақ эвазига фаолиятни амалга ошириш ҳуқуқи учун рухсатнома бериш тартиби жорий этилиши назарда тутилган. Бу ҳақдаги норматив-ҳуқуқий ҳужжат 2018 йил 15 октябргача қабул қилиниши керак.

Бунда спиртли маҳсулотларни сотиш ва хизматлар кўрсатиш вақтига доир чекловларни қуйидаги савдо объектлари ва умумий овқатланиш корхоналарига нисбатан татбиқ этмаслик таклиф этилмоқда:

• меҳмонхоналар ва бошқа жойлаштириш воситалари таркибида ташкил этилган;
• махсус туризм зоналари – эркин ва кичик туризм зоналари, туризм зоналари ва туризм кластерларида фаолият юритувчи;
• «Tourist friendly» тизими орқали сертификатланган.

Шунингдек алкоголли маҳсулотлар савдо қилинадиган савдо объектлари ва умумий овқатланиш корхоналарини техник қўриқлаш воситалари, ёнғиндан дарак берувчи, қўриқлаш сигнализациялари ва видеокузатув тизимлари билан жиҳозлаш ҳамда ИИОнинг техник қўриқлаш пунктларига улаш чораларини кўриш режалаштирилмоқда.

Лойиҳа ўзгартирилиши, унга қўшимча киритилиши ёки рад этилиши мумкин.

Ленара Хикматова.

Қуйидаги НҲҲга ҳам қаранг:

«Алкоголь ва тамаки маҳсулотларининг тарқатилиши ҳамда истеъмол қилинишини чеклаш тўғрисида»ги Қонун

Президентнинг 17.08.2018 йилдаги “Тошкент шаҳрида бошқарувнинг алоҳида тартибини жорий этиш бўйича ҳуқуқий эксперимент тўғрисида”  ПФ-5515-сон Фармони

Алкоголли маҳсулотлар билан чакана савдо қилиш қоидалари