Ваколатли иқтисодий операторлар тўғрисидаги низом лойиҳаси муҳокамага қўйилди.
Низомнинг таклиф этилаётган янги таҳрири амалдаги қонунчиликни Жаҳон божхона ташкилотининг Савдога кўмаклашиш ва хавфсизлик стандартларига мувофиқлаштиришга қаратилган.
Маълумот учун: мазкур стандартларда божхона органларига тавсиялар акс эттирилган бўлиб, улар қуйидаги масалаларга дахл қилади:
- божхона назоратининг комплекс тартиб-таомилларини амалга ошириш йўли билан етказиб бериш занжирини комплекс бошқаришни таъминлаш
- замонавий технологиялар ёрдамида юкларни текшириш;
- Хавф жаражаси юқори юқори хавфли юкларни аниқлаш;
- юк ва контейнерлар ҳақида олдиндан электрон хабар бериш.
Лойиҳа ваколатли иқтисодий операторларга белгиланган махсус соддалаштиришларни халқаро стандартларга мувофиқлаштиришни назарда тутади:
- юридик шахсни ваколатли иқтисодий операторлар реестрига киритилганлик тўғрисидаги гувоҳномаларни қатъий 3 турга ажратиш:
- божхона масалаларида оператор;
- хавфсизлик масалаларида оператор;
- божхона ва хавфсизлик масалаларида оператор.
Маълумот учун: ваколатли иқтисодий оператор божхона операцияларини амалга оширишда соддалаштирилган божхона тартиб-таомилларидан фойдаланиш учун юридик шахсларга бериладиган мақом.
Шунингдек лойиҳа операторни танлаб олишда амалдаги мезон ва талабларни ўзгартиришни назарда тутади:
- ташқи иқтисодий фаолият билан шуғулланишда белгиланган муддат ташувчи ва божхона брокерлари учун 2 йил этиб белгиланди (1 йилга қисқартирилди);
- операторнинг молиявий барқарорлиги бўйича талаблар киритилиб, унинг услубияти ишлаб чиқилди;
- махсус соддалаштиришлардан тўғри ва тўлиқ фойдаланилишини таъминлаш мақсадида операторликка номзод ташкилотнинг ходимини ўқитиш талаби белгиланди;
- божхона аудити мақсадларида ўз-ўзини баҳолаш бўйича саволнома ишлаб чиқилиб, бу орқали номзодларнинг операторлик талабларига жавоб беришда ўзини текшириш имкони яратилди.
Лойиҳа ўзгартирилиши, унга қўшимчалар киритилиши ёки рад этилиши мумкин.
Собир Нурбердиев.
