Президентнинг 2019 йил 18 февралдаги қарори йилқичилик ва от спортини ривожлантиришга йўналтирилган.
Ўзбекистон йилқичилик ва от спорти федерацияси (бундан кейин – Федерация) қошида Қорабайир зотли отларни етиштириш ва кўпайтириш бўйича инновацион селекция-генетика маркази (бундан кейин – Марказ) ташкил этилади.
Марказ юридик шахс мақомига эга. Унинг ҳузурида отларнинг қон гуруҳини аниқлаш ва маълумотлар базасини яратиш бўйича лаборатория фаолият юритади. Марказ директори лавозими бўйича Федерация раисининг ўринбосари ҳисобланади.
Мутахассис-чавандозлар, Марказ лабораторияси мутахассислари, кавалер-инструкторлар, шунингдек манфаатдор идоралар ходимлари хорижда ўқийдилар ва малака оширадилар. Марказ лабораторияси замонавий ускуна ва малакали мутахассислар билан жамланишини таъминлаш Жисмоний тарбия ва спорт вазирлиги ҳамда Федерация зиммасига юклатилди.
Ҳужжатда йилқичилик ва от спортини ривожлантиришга доир бошқа қатор чора-тадбирлар ҳам назарда тутилган, хусусан:
- от спорти клубларини ташкил этиш мақсадида тадбиркорлик субъектларига бепул фойдаланиш учун зарур бинолар ва иншоотлар тақдим этилади;
- олий ва касб-ҳунар таълими муассасаларида кадрлар ва мутахассис-йилқичилар тайёрлаш ўқув режалари ҳамда дастурлари такомиллаштирилади, хорижий мутахассисларни жалб этган ҳолда уларнинг малакасини ошириш чоралари кўрилади;
- 2019 йилда от спорти бўйича ҳудудлар ва республика биринчилиги мусобақалари ўтказилади, биз мазкур спорт тури бўйича халқаро турнирларда иштирок этамиз;
- юридик шахсларнинг солиқ солинадиган даромади Федерация фаолиятини молиялаштиришга йўналтириладиган хайрия ёрдами кўринишидаги маблағлар суммасига, бироқ солиқ солинадиган фойданинг 10%идан кўп бўлмаган миқдорга камайтирилади.
Константин Мосин.
