Иқтисодиёт ва молия вазирининг (17.01.2025 й. АВ рўйхат рақами 3599-сон) буйруғи билан “Инсофсиз ижрочиларнинг ягона реестрини шакллантириш тартиби тўғрисидаги низом” тасдиқланди. Ҳужжат 3 ойдан сўнг кучга киради.
"Давлат харидлари тўғрисида"ги Қонуннинг (22.01.2021 й. ЎРҚ-684-сон) 18-моддасига мувофиқ Иқтисодиёт ва молия вазирлиги давлат харидлари соҳасидаги ваколатли орган ҳисобланади. У инсофсиз ижрочиларнинг ягона реестрини шакллантириш тартибини ишлаб чиқади ва тасдиқлайди.
Низом инсофсиз ижрочиларнинг ягона реестрини шакллантириш ва юритиш тартибини белгилайди. У қуйидагиларни белгилайди:
- Реестрни шакллантириш асослари ва мурожаат қилиш тартиби;
- Ишчи комиссия ва Реестрни шакллантириш тартиби;
- Реестрни юритиш ҳамда инсофсиз ижрочини Реестрдан чиқариш тартиби.
Виждонсиз ижрочи – давлат хариди тартиб-таомилининг иштирокчиси ёки ғолиби ёхуд ижрочиси бўлган мамлакат резиденти ёки норезиденти, жисмоний ёки юридик шахс.
Виждонсиз ижрочи Реестрга киритилган пайтдан бошлаб 2 йил ўтгач, Реестрдан автоматик тарзда чиқарилади. Шунингдек, у суднинг тегишли қарорига кўра Реестрдан чиқарилиши мумкин.
Ҳужжат Қонун ҳужжатлари маълумотлари миллий базасида давлат тилида эълон қилинган ва 18.04.2025 йилдан кучга киради.
Лола Абдуазимова
