.png)
Вазирлар Маҳкамасининг 29.01.2025 йилдаги 49-сон қарори билан Олий маълумотли кадрларга давлат буюртмасини шакллантириш тартиби тўғрисидаги низом тасдиқланди.
Ҳужжат билан 2025/2026 ўқув йилидан бошлаб қуйидагилар белгиланди:
- олий маълумотли кадрларга давлат буюртмаси Иқтисодиёт ва молия вазирлиги тизимидаги махсус электрон платформада тўпланган маълумотлар ҳамда меҳнат бозоридаги талаб таҳлили асосида аниқланади;
- кадрларга бўлган эҳтиёж 4 йиллик даврга шакллантирилади ва ҳар йили меҳнат бозоридаги ўзгарувчан тенденциялар, минтақалар ижтимоий муассасалари ва иқтисодиёт тармоқларининг кадрлар билан таъминланганлигини ҳисобга олган ҳолда платформага тегишли тузатишлар киритилади.
Тасдиқланган Низом қуйидагиларни белгилайди:
- давлат буюртмасини шакллантиришда маълумотларни йиғиш ва қайта ишлаш ҳамда буюртмани юқори органларга тақдим этиш тартиби;
- иш берувчиларнинг олий маълумотли кадрларга бўлган эҳтиёжини аниқлаш усуллари;
- иқтисодиёт тармоқларининг мутаносиб ривожланиши мақсадида давлат буюртмасини шакллантиришнинг устувор йўналишлари.
Платформада қуйидаги маълумотлар жойлаштирилади:
- иқтисодий фаолият турлари бўйича иқтисодиёт тармоқларида расмий банд бўлганлар сони;
- давлат ва нодавлат олий ўқув юртлари битирувчиларининг олий ўқув юртини тугатгандан кейин фаолият турлари бўйича расмий ишга жойлашиши;
- меҳнат ресурслари баланси, меҳнат бозоридаги бўш иш ўринлари, иқтисодий фаолият турлари бўйича бандлик даражалари;
- республика ҳудудида фаолият юритаётган давлат, нодавлат ва хорижий олий ўқув юртлари ҳамда уларнинг филиаллари битирувчилари сони;
- бакалавриат ва магистратура дастурлари бўйича ўқитиш учун профессор-ўқитувчилар таркиби ва моддий-техник база бўйича мавжуд ресурслар ҳажми.
Ҳужжат Қонун ҳужжатлари миллий базасида давлат тилида эълон қилинди ва 30.01.2025 йилдан кучга кирди.
Лола Абдуазимова
