Президентнинг 30.05.2025 йилдаги "Ўрмон ва яшил ҳудудларни кўпайтириш, чўлланишга қарши курашиш агентлиги фаолиятини ташкил этиш чора-тадбирлари тўғрисида"ги ПҚ-197-сон қарори қабул қилинди.
Ҳужжат билан 2030 йилгача ўрмон фонди ресурсларидан самарали фойдаланишнинг қуйидаги асосий мақсадли кўрсаткичлари белгиланди:
- 1,5 млн гектарда ўрмонлар яратиш, ўрмонларни қайта тиклаш, шунингдек ўрмон фонди ерларининг 3,8 минг гектарида доривор, озиқ-овқатбоп ва зиравор ўсимликлар плантацияларини қуриш;
- дарахт ва буталар уруғларини 9,2 минг тонна тайёрлаш, шунингдек 919 млн кўчат ва ниҳол етиштириш;
- ўрмон фонди ерларининг 47,7 минг гектарини ўзлаштириш, 18,7 минг гектарда ҳимоя ўрмонзорларини қуриш, шунингдек йилига 31 минг тонна қишлоқ хўжалиги маҳсулотларини етиштириш ва бошқалар.
Ўрмон хўжалиги соҳасини тўлиқ рақамлаштириш, "ақлли ўрмон хўжалиги" технологияларини жорий этиш учун Ўрмон ва яшил ҳудудларни кўпайтириш, чўлланишга қарши курашиш агентлиги ҳузуридаги "Ўрмонтехносервис" давлат унитар корхонаси базасида Ўрмон хўжалигини рақамлаштириш маркази давлат муассасаси ташкил этилади.
Марказ ўрмон ресурсларини бошқариш жараёнларини рақамлаштириш, уларнинг ҳолатини реал вақт режимида мониторинг қилиш, шунингдек замонавий технологиялар, сунъий интеллект ва интеграциялашган ахборот тизимларини жорий этишни назарда тутувчи "Ақлли ўрмон хўжалиги" (Smart forestry) ахборот платформасининг ягона операторига айланади.
Ихтисослаштирилган ўрмон хўжаликлари фаолияти "илм – лойиҳалар – амалиёт" ўзаро таъсири асосида кўрилади.
Ҳужжат билан тасдиқланди:
- "Ўрмон хўжалигини рақамлаштириш маркази" давлат муассасасининг асосий вазифалари ва молиялаштириш манбалари;
- 2025-2030 йилларга прогноз кўрсаткичлари:
- ўрмонлар яратиш ва ўрмонларни қайта тиклаш;
- чўлланиш ва қум кўчиши, сув ва шамол эрозияси тупроқнинг олдини олиш, шунингдек чўл, тоғли ва тоғолди ҳудудларда экологик муҳитни яхшилаш мақсадида ҳимоя ўрмонзорларини қуриш;
- дарахт ва буталар уруғларини тайёрлаш;
- кўчат ва ниҳол етиштириш;
- ўрмон фонди ерларида доривор, озиқ-овқатбоп ва зиравор ўсимликларни етиштириш;
- ўрмон фонди ерларида доривор, озиқ-овқатбоп ва зиравор ўсимликлар плантацияларини қуриш ва бошқалар.
Ҳужжат Қонун ҳужжатлари маълумотлари миллий базасида эълон қилинган ва 02.06.2025 йилдан кучга кирди.
Лола Абдуазимова
