Вазирлар Маҳкамасининг 30.07.2025 йилдаги "Географик объектларга доир айрим муносабатларни тартибга солиш чора-тадбирлари тўғрисида"ги 475-сон қарори қабул қилинди.
Ҳужжат билан географик объектларни тизимлаштиришни, шу жумладан уларнинг коди, тури, қисқартирилган номи ва классификация кодини белгилашни назарда тутувчи Географик объектлар классификатори тасдиқланди. Географик объектлар номлари давлат реестри энди Классификатор асосида юритилади.
2025 йил 1 октябргача табиий объектлар, транспорт ва муҳандислик инфратузилмаси объектлари номлари Классификатор асосида рўйхатга олиниши керак.
Вилоят ҳокимликлари Кадастр агентлиги, Статистика агентлиги ва Ўзбекистон маҳаллалари уюшмаси билан биргаликда 2026 йил 1 июлгача республиканинг барча кўчалари номларини рўйхатга олиб, уларни реестрга мувофиқлаштириш, янги ташкил этилган ва номсиз кўчаларни номлаш, шунингдек 12.10.2011 йилдаги ЎРҚ-303-сон "Географик объектларнинг номлари тўғрисида"ги Қонун талабларига зид номларни ўзгартириш чораларини кўришлари керак.
Қарор билан шунингдек кўча номи ва кўчмас мулк объекти рақами кўрсаткичининг шакли, ўлчамлари, ёзилиши ва техник шартларини белгилайдиган Кўча номи ва кўчмас мулк объекти рақами кўрсаткичини ўрнатиш тартиби тўғрисидаги низом тасдиқланди.
Ҳужжат Қонун ҳужжатлари маълумотлари миллий базасида эълон қилинган ва 30.07.2025 йилдан кучга кирди.
Лола Абдуазимова
