Вазирлар Маҳкамасининг 26.08.2025 йилдаги 538-сон қарори билан айрим норматив-ҳуқуқий ҳужжатларга ўзгартириш ва қўшимчалар киритилди.
Хусусан, 11.01.1995 йилдаги 11-сон ВМҚ билан тасдиқланган Хорижий давлатлар оғир юкли ва катта ҳажмли транспорт воситаларининг Ўзбекистон Республикаси ҳудуди бўйлаб юриши учун тўловлар тўғрисидаги низомга қуйидаги ўзгартиришлар киритилди:
Транспорт воситасининг умумий ҳақиқий массаси рухсат берилганига нисбатан ошганлиги учун тўлов янги тарифларга мувофиқ белгиланади (1-жадвалга қаранг). Бунда умумий ҳақиқий массанинг рухсат берилганига нисбатан ошиши миқдорига (тонн) қараб 1 км юрилган масофа учун тарифлар (АҚШ долларида белгиланган) ўртача 2 баравар оширилди.
Оғир юкли транспорт воситаларининг автомобиль йўлларидан ўтишида ўққа тушадиган ҳақиқий оғирликнинг (Оф) рухсат берилганга (Од) нисбатан ошганлиги учун ҳар бир ортиқча юкланган юк учун тўлов ҳам ўзгарди (2-жадвал). Бунда тарифлар ҳам оширилди.
Транспорт воситалари ҳажмларининг ортиқчалиги учун тўлов юриб ўтилган 1 км йўл учун $0,32 ($0,15 эди) миқдорида ундирилади.
Оғир юкли ва йирик габаритли транспорт воситалари ўтиши учун аризаларни кўриб чиқиш, йўналишни келишиш ва рухсатнома бериш учун тўланадиган тўлов миқдори "Лицензия" ахборот тизимида қуйидаги тарзда аниқланади:
- 100 км га қадар — БҲМнинг 54%и ($5 эди);
- ҳар бир кейинги километр учун – БҲМнинг 0,24%и ($0,11 эди).
Ҳужжат Қонун ҳужжатлари маълумотлари миллий базасида эълон қилинган ва 27.08.2025 йилдан кучга кирди.
Лола Абдуазимова
