Президентнинг 04.09.2025 йилдаги «Қишлоқ хўжалиги соҳасида қўшилган қиймат солиғини ҳисоблашнинг соддалаштирилган тартибини жорий этиш чора-тадбирлари тўғрисида»ги ПФ-153-сон Фармони қабул қилинди.
Ҳужжат билан қишлоқ хўжалиги маҳсулотлари реализациясида ҚҚСнинг ноль ставкасини жорий этиш чоралари тасдиқланди.
2026 йил 1 январдан бошлаб, қишлоқ хўжалиги ишлаб чиқарувчилари етиштирган маҳсулотларни сотишда ҚҚС учун ноль ставка қўлланилади. Бундан пахта ва ғалла мустасно. Имтиёз қўлланиладиган маҳсулотлар рўйхати Қишлоқ хўжалиги вазирлиги ва Солиқ қўмитаси томонидан тасдиқланади ва уларнинг расмий веб-сайтларида эълон қилинади.
Шу билан бирга, ҚҚСни автоматик қайтариш механизми жорий этилади – қишлоқ хўжалиги маҳсулотларини ишлаб чиқариш учун товар ва хизматлар харидида тўланган ҚҚС суммалари уч кун ичида қайтарилади.
Шунингдек, Солиқ қўмитаси реал вақт режимида электрон ҳисоб-фактураларни таҳлил қилишнинг автоматлаштирилган тизимини жорий этади, буда хавф даражасига асосланган ёндашув қўлланилади. Хавф даражаси юқори бўлган ҳолларда ҚҚСни ҳисобга олиш фақат солиқ тўлиқ бюджетга тўланганидан сўнг амалга оширилади.
2027 йил 1 январгача барча ҳудудларда қишлоқ хўжалиги соҳасида ишловчилар учун янги қоидалар бўйича ахборот ва тушунтириш ишлари олиб борилади.
Шунингдек, Солиқ кодексига ўзгартишлар киритиш ва ҚҚСни мониторинг қилиш ҳамда ҳисобга олиш бўйича техник тартибларни тасдиқлаш режалаштирилган.
Ушбу чора-тадбирлар аграр секторни “соя”дан чиқариш, ҚҚСни ҳисоблаш ва қайтаришнинг шаффоф тизимини яратиш, ҳамда қишлоқ хўжалигида қонуний товар айланмасини рағбатлантиришга қаратилган.
Ҳужжат Қонун ҳужжатлари маълумотлари миллий базасида эълон қилинган ва 06.09.2025 йилдан кучга кирди.
Саодат Усмонова
