Ўзбек-Француз университети ташкил этилади Президентнинг 26.11.2025 йилдаги ПҚ-354-сон қарори билан Ўзбек-Француз университетини ташкил этиш чора-тадбирлари белгиланди.
Ўзбекистон ва Франция ўртасида таълим соҳасидаги алоқаларни мустаҳкамлаш, Франция университетларининг таълим дастурлари асосида кадрлар тайёрлаш мақсадида Ўзбек-Франция университети ташкил этилмоқда.
2025 йил 12 мартда Ўзбекистон ва Франция Ҳукуматлари ўртасида қуйидагиларни назарда тутувчи Ҳамкорлик тўғрисидаги битим имзоланди:
• Ўзбекистон томонидан Олий таълим, фан ва инновациялар вазирлиги ҳамда Франция томонидан Олий таълим, тадқиқотлар ва коинот вазирлиги Университет таъсисчилари ҳисобланади;
• Университетни ташкил этиш ва фаолиятини юритиш жараёнида Франция университетлари консорциуми иштирок этади. Пуатье, Ренна, Гавр Нормандия ва Люмmер Лион 2 университетлари консорциум таркибига киритилган.
Консорциумнинг вазифалари:
• Университетда таълим жараёнини ташкил этиш, ўқув режалари, дастурлари ва материалларини ишлаб чиқиш, шунингдек, талабаларни қабул қилиш ва ўқитувчиларни танлаш жараёнларига кўмаклашиш;
• Университет талабалари ва профессор-ўқитувчиларини Францияга юбориш учун молиялаштириш манбаларини аниқлаш;
• Университет талабалари учун уларнинг маълумотлар базаларидан, шу жумладан кутубхона фондининг электрон базасидан фойдаланиш тартибини соддалаштириш;
• Университетнинг таълим дастурларини Франция Республикасида аккредитациядан ўтказишда кўмаклашиш.
Университетнинг маъмурий-молиявий масалалар бўйича қарорлари унинг Васийлик кенгаши томонидан қабул қилинади, унинг таркиби тенглик асосида Ўзбекистон ва Франция томонлари томонидан шакллантирилади.
Университетга ўқишга қабул қилиш параметрлари, тўлов-контракт миқдори, ўқишга қабул қилиш ва битирувчиларни аттестациядан ўтказиш тартиби Университетнинг Васийлик кенгаши томонидан белгиланади.
Университетда дастлаб магистратура босқичида, кейинчалик босқичма-босқич бакалавриат ва докторантурада кадрлар тайёрлаш, шунингдек, Университетга кириш учун тайёрлов курслари жорий этилмоқда.
Университетда таълим жараёни мақсадли давлат гранти, шунингдек, тўлов-контракт асосида амалга оширилади.
Университет битирувчиларига Университет дипломи ва (ёки) таълим дастурлари Франция Республикасида аккредитациядан ўтган, консорциум таркибига киритилган Франциянинг тегишли университети дипломи берилади. Бунда битирувчиларга берилган диплом Ўзбекистон Республикасида тан олинади.
Университет фаолиятини молиялаштириш манбалари:
• Университетга ўқишга қабул қилинган талабалар умумий сонининг 30 фоизидан ошмаган миқдорда талабаларни давлат гранти асосида ўқитиш учун Олий таълим, фан ва инновациялар вазирлигига ажратиладиган Давлат бюджети маблағлари;
• талабаларни тўлов-контракт асосида ўқитишдан тушадиган маблағлар;
• Университетда тайёрланадиган мутахассисликлар бўйича магистр кадрларга эҳтиёж мавжуд бўлган ОТМларнинг бюджетдан ташқари маблағлари;
• грантлар, ҳомийлик хайриялари ва қонун ҳужжатларида тақиқланмаган бошқа манбалар.
Ҳужжат Қонун ҳужжатлари маълумотлари миллий базасида эълон қилинган ва 26.11.2025 йилдан кучга кирди.
Лола Абдуазимова
