05.02.2026 йилдаги ЎРҚ-1117-сон Қонун билан бир қатор қонун ҳужжатларига ер муносабатларини, тадбиркорлик фаолиятини ва аҳоли бандлигини тартибга солишни такомиллаштиришга қаратилган ўзгартириш ва қўшимчалар киритилди.
Янги нормаларга кўра, давлат ўрмон хўжалиги органлари ўрмон фондининг фойдаланилмаётган ерларини жисмоний ва юридик шахсларга электрон онлайн-аукцион орқали ижарага бериш ҳуқуқига эга бўлди. Бундай механизм ер ресурсларини тақсимлашнинг шаффофлигини ошириш, бизнес ва аҳолининг улардан фойдаланиш имкониятларини кенгайтиришга қаратилган.
Ўзгартиришлар Иқтисодий процессуал кодексга ҳам таъсир кўрсатди. Эндиликда тадбиркорлик фаолиятининг айрим турларини амалга ошириш учун лицензиялар ва рухсатномаларнинг амал қилиши 10 кундан ортиқ, бироқ олти ойдан кўп бўлмаган муддатга тўхтатиб турилиши мумкин.
"Аҳолини иш билан таъминлаш тўғрисида"ги Қонунга тузатиш киритилди. Ўзини ўзи банд қилган шахслар учун БҲМнинг 1 бараваридан кам бўлмаган миқдорда ихтиёрий равишда ижтимоий солиқ тўлаш белгиланди. Илгари бундай тўловнинг энг кам миқдори БҲМнинг 50 фоизини ташкил этган.
Ҳужжат Қонун ҳужжатлари маълумотлари миллий базасида эълон қилинган ва 07.02.2026 йилдан кучга кирди.
