Президент 09.10.2026 йилдаги "Ўзбекистон Республикаси Вазирлар Маҳкамасининг ижро этувчи тузилмасини янада такомиллаштириш чора-тадбирлари тўғрисида"ги ПФ-217-сон Фармонни имзолади.
Ҳужжатга кўра, Вазирлар Маҳкамаси тузилмасида янги котибият ташкил этилади. Унинг штат бирлиги 12 нафарни ташкил этади. Улардан бештаси Вазирлар Маҳкамасининг Ижтимоий ривожланиш масалалари бўлими ҳисобидан, яна еттитаси қайта ташкил этилган Мактабгача ва мактаб таълими вазирлиги ҳамда Олий таълим, фан ва инновациялар вазирлигининг штатларини оптималлаштириш натижасида ажратилади.
Бош вазирнинг биринчи ўринбосари – таълим ва фан вазирига фармоннинг иловасига мувофиқ республика ва маҳаллий ижро этувчи ҳокимият органлари ҳамда бошқа ташкилотлар бириктирилади.
Мансабдор шахс берилган ваколатлар доирасида вазирликлар, қўмиталар, агентликлар ва инспекциялар, шунингдек Қорақалпоғистон Вазирлар Кенгаши, вилоятлар ва Тошкент шаҳар ҳокимликлари фаолиятига умумий раҳбарлик қилади ва уларнинг фаолиятини мувофиқлаштиради.
Мувофиқлаштириш таълим, фан ва соғлиқни сақлаш соҳаларидаги вазифаларни бажаришга қаратилади.
Вазирлар Маҳкамасига икки ҳафта муддатда Бош вазирнинг биринчи ўринбосари – таълим ва фан вазирининг функционал вазифалари ҳамда янги котибият тўғрисидаги низомни тасдиқловчи Ҳукумат қарорини қабул қилиш топширилди.
Ҳужжат Қонун ҳужжатлари маълумотлари миллий базасида эълон қилинган ва 12.10.2026 йилдан кучга кирди.
