Вазирлар Маҳкамасининг 04.11.2024 йилдаги ВМҚ-733-сон қарори билан “Ўзгалар парваришига муҳтож бўлган ёлғиз яшовчи ва ёлғиз кексалар ва ногиронлиги бўлган шахсларга темир йўл транспортида ёки шаҳарлараро автобус учун бепул чипталар бериш тартиби тўғрисидаги Низом” тасдиқланди.
Низом бепул саёҳат чипталарини бериш ва уларни ҳисобга олиш тартибини, шунингдек бепул саёҳатлар харажатларини қоплаш механизмини назарда тутади.
"Инсон" ижтимоий хизматлар маркази "Ягона миллий ижтимоий ҳимоя" ахборот тизимида ёлғиз ва ёлғиз яшовчи қариялар ҳамда бировнинг парваришига муҳтож ногиронлиги бўлган шахслар Реестрини юритади.
Ҳужжатда белгиланишича, "Ўзбекистон темир йўллари" АЖнинг ваколатли бўлинмалари, автовокзаллар мансабдор шахсларига бир ой ичида Реестрдан фойдаланиш имконияти очилади.
Реестрга киритилган ёлғиз қариялар ва ногиронлиги бўлган шахсларга ҳамда уларга бевосита ҳамроҳлик қилувчи шахсга йилига бир марта бепул темир йўл ёки шаҳарлараро автобус чипталари (бориш ва қайтишга) ажратилади.
Бепул йўл чиптасини расмийлаштириш учун ёлғиз шахс, шунингдек парваришга муҳтож кексалар ва имконияти чекланган шахслар масъул ходимга шахсини тасдиқловчи ҳужжатни тақдим этиши керак.
Ҳужжат Қонунчилик маълумотлари миллий базасида давлат тилида эълон қилинган ва 04.11.2024 йилдан кучга кирди.
Лола Абдуазимова
