Вазирлар Маҳкамасининг 24.09.2020 йилдаги «Вазирлар Маҳкамасининг «Коронавирус пандемияси даврида дори воситалари, тиббий буюмлар ва тиббий техникалар муомаласини тартибга солишга доир чора-тадбирлар тўғрисида»ги 22.07.2020 йилдаги 449-сон қарорига ўзгартириш ва қўшимчалар киритиш ҳақида»ги 582-сон қарори қабул қилинди.
COVID-19 га антитана ва антигенга экспресс тестлар Ўзбекистонда рўйхатдан ўтказмасдан ҳамда мажбурий сертификатлаштирмасдан импорт қилинадиган, COVID-19 инфекцияси билан касалланган беморларни даволашда қўлланиладиган тиббий буюмлар ва тиббий техникалар рўйхатига киритилди.
Ўзбекистонда рўйхатдан ўтказмасдан, мажбурий сертификатлаш шарти билан импорт қилинадиган, COVID-19 инфекцияси билан касалланган беморларни даволашда қўлланиладиган дори воситалари ва биологик фаол моддалар рўйхатига қуйидаги препаратлар киритилди:
- грипп вакцинаси (ЎРВИ);
- коронавирус вакцинаси (COVID-19);
- пневмококк вакцинаси;
- бария сульфат;
- панкурония бромид/пипекурония бромид/атракурия бесилат;
- цефепим-тазобактам;
- нитроглицерин.
COVID-19 инфекцияси билан касалланган беморларни даволашда қўлланиладиган дори воситаларини ишлаб чиқариш учун ишлатиладиган дори моддаларини (субстанцияларни) олиб киришда 2021 йил 1 мартга қадар қўшилган қиймат солиғини тўлашдан озод этилади.
Тиббий буюмлар, дори воситалари ва уларни ишлаб чиқаришда ишлатиладиган дори компонентларини Ўзбекистонда рўйхатдан ўтказмасдан божхонада расмийлаштириш ва реализация қилиш муддати 2020 йил 1 октябрдан 2021 йил 1 мартга қадар узайтирилган.
Ҳужжат Қонун ҳужжатлари маълумотлари миллий базасида эълон қилинган ва 25.09.2020 йилдан кучга кирди.
Лола Абдуазимова.
