Президент томонидан 04.11.2024 йилдаги «Ўзбекистон Республикаси фуқаросининг хорижга чиқиш биометрик паспортини расмийлаштириш ва бериш бўйича давлат хизматларини кўрсатиш тартиби такомиллаштирилиши муносабати билан Ўзбекистон Республикаси Президентининг айрим қарорларига ўзгартириш ва қўшимчалар киритиш тўғрисида»ги ПҚ -380-сонли Қарор имзоланди.
Ўзгартиришларга кўра, хорижга чиқиш паспортини почта орқали етказиш ҳақида сўров мавжуд бўлганда, маълумотларни йиғиш пункти ходими ҳужжатни почта хизмати ходимига топширади.
Почта ходими хорижга чиқиш паспортини фуқарони яшаш манзилига етказади, у уйда бўлмаган тақдирда ҳужжатни почта бўлимида 10 кун давомида сақлайди. Мазкур муддат ичида фуқаро ҳужжатини олиб кетмаса, хорижга чиқиш паспорти маълумотларни йиғиш пунктига қайтарилади.
Почта хизмати ҳақи фуқаро томонидан тўланади.
Шунингдек, эндиликда бола учун хорижга чиқиш паспортини олишга сўровномани тўлдиришда вояга етмаган шахснинг ота-оналари ва қонуний вакиллари болани хорижда қаровсиз қолдирганлик учун жавобгарлик ҳақида огоҳлантирилади.
Ҳужжат Қонун ҳужжатлари маълумотлари миллий базасида эълон қилинган ва 05.11.2024 йилдан кучга кирди.
Собир Нурбердиев
