Вазирлар Маҳкамасининг 19.05.2018 йилдаги 378-сон қарори билан хусусий мактабгача таълим муассасаларини кредитлаш ва субсидиялаш тартиби белгиланди.
Эслатиб ўтамиз, Президентнинг 5.04.2018 йилдаги ПҚ-3651-сон қарори билан нодавлат болалар боғчаларини ташкил этиш соҳасига давлат-хусусий шерикчилик (бундан кейин – ДХШ) механизмлари жорий этилди. Уларда Мактабгача таълим вазирлиги (бундан кейин – МТВ) билан ДХШ тўғрисида тузилган битимлар асосида хусусий шерикларнинг лойиҳаларини молиялаштириш назарда тутилади.
Кредит ажратиш шартлари
Кредитлаш учун ажратиладиган маблағлар Вазирлар Маҳкамаси ҳузуридаги Ўзбекистон Республикасини ривожлантириш давлат дастурларини молиялаштириш жамғармасида алоҳида очиладиган махсус ҳисобварақда жамланади. Бунда Жамғарманинг ижро этувчи дирекцияси тижорат банклари билан келишув тузади.
МТВ билан шерикчилик тўғрисида тузилган битимларнинг ягона реестрига киритилган хусусий шериклар кредит олишда устувор ҳуқуққа эга бўладилар.
Тижорат банклари томонидан 3 йиллик имтиёзли давр билан 15 йил муддатга йиллик 1% ставкада кредитлар ажратилади.
Давлат субсидиясини қандай олиш мумкин
Ажратиладиган субсидиялар миқдорлари хусусий болалар боғчасининг бир нафар тарбияланувчисига (9 ва 10,5 соатлик иш режимидаги) сарфланадиган харажатлар суммасининг қуйидаги миқдорларида белгиланади:
- Тошкентда – 30%;
- Нукус шаҳри ҳамда вилоят марказларида – 40%;
- қолган ҳудудларда – 50%.
Бир нафар тарбияланувчи учун сарфланадиган харажатлар миқдори Молия вазирлиги ва МТВ томонидан аниқланади. Таълим муассасаси МТВ билан ДХШ тўғрисида келишув имзолагандан сўнг, субсидия олиш учун ҳудудий молия органига ариза билан мурожаат қилиши керак.
Аризага қуйидаги маълумотлар илова қилинади:
- юридик шахснинг номи, почта манзили ва ташкилий-ҳуқуқий шакли, банкдаги ҳисоб рақамлар реквизитлари;
- ДХШ келишуви нусхаси;
- таълим муассасасининг қуввати, фаолиятининг бошланиш санаси ва ота-оналар тўлови тўғрисидаги маълумотнома.
Молия органи аризани 5 иш куни мобайнида кўриб чиқади ва уни қаноатлантириш ёки рад этиш тўғрисида қарор қабул қилади, бу ҳақда аризачини ёзма ёки электрон шаклда хабардор қилади.
Субсидиялар ажратиш даври хусусий шерик билан МТВ ўртасида субсидияларни ажратиш тўғрисида тузилган битимда кўрсатилади.
Ижобий қарор қабул қилинган тақдирда хусусий шерик молия бўлимига ҳар ойнинг 5-санасига қадар ўтган ойда болалар боғчасига ҳақиқатда қатнаган болалар сони тўғрисида маълумотни, шунингдек ота-оналар томонидан тўланган тўлов ҳужжатларини илова қилган ҳолда субсидиялар олиш учун буюртманомани тақдим этади.
Ҳудудий молия бўлими тақдим этилган барча буюртманомаларни умумлаштириб, реестр тузади ва уни ҳисобот ойидан кейинги ойнинг 10-санасигача тегишли ғазначилик бўлинмасига тўловни амалга ошириш учун тақдим этади.
Ҳужжат Қонун ҳужжатлари маълумотлари миллий базасида эълон қилинган ва 22.05.2018 йилдан кучга кирди.
Мазкур ҳужжатнинг тўлиқ матни, шарҳлар ва у билан боғлиқ бошқа қонун ҳужжатларига ҳаволалар билан «Ўзбекистон Республикаси қонун ҳужжатлари» ахборот-қидирув тизимида танишиш мумкин.
Ленара Хикматова.
