Вазирлар Маҳкамасининг 09.04.2026 йилдаги «Интеллектуал фаолият натижаларини рағбатлантиришнинг қўшимча чора-тадбирлари тўғрисида»ги 160-сон қарори қабул қилинди.
Ҳужжат билан олий таълим ташкилотларида, илмий-тадқиқот муассасаларида, технопаркларда мавжуд штат бирликлари доирасида юридик шахс бўлмаган технологиялар ва инновацияларни қўллаб-қувватлаш марказларини ташкил этиш назарда тутилган.
Марказлар тадқиқот натижаларини патентлашга, уларни ишлаб чиқариш жараёнларига жорий этишга ва тижоратлаштиришга кўмаклашади.
Ҳужжат билан қуйидагилар тасдиқланди:
- технологиялар ва инновацияларни қўллаб-қувватлаш марказлари ташкил этиладиган ташкилотлар рўйхати;
- технологиялар ва инновацияларни қўллаб-қувватлаш марказлари тўғрисидаги намунавий низом;
- интеллектуал фаолият бўйича танловларни ўтказиш тартиби тўғрисидаги низом.
Танлов 2 босқичда – Қорақалпоғистон Республикаси, вилоятлар ва Тошкент шаҳри миқёсида, сўнгра – республика миқёсида қуйидаги номинациялар бўйича ташкил этилади:
- «Энг яхши ихтиро»;
- «Энг яхши фойдали модель»;
- «Энг яхши саноат намунаси»;
- «Энг яхши ЭҲМ учун дастур ва маълумотлар базаси»;
- «Энг яхши селекция ютуғи».
Инновацион ривожланиш агентлиги ҳар йили 1 майга қадар танлов шартлари ва баҳолаш мезонларини тасдиқлайди, шунингдек танлов ўтказилиши ҳақида ўзининг расмий веб-сайтида ва ижтимоий тармоқлардаги саҳифаларида эълон қилади.
Танловнинг 2-босқичи ғолиб ва совриндорлари қуйидаги миқдорларда пул мукофотлари билан тақдирланади:
1-ўрин – БҲМнинг 150 баравари;
2-ўрин – БҲМнинг 125 баравари;
3-ўрин – БҲМнинг 100 баравари.
Ҳужжат Қонун ҳужжатлари маълумотлари миллий базасида давлат тилида эълон қилинган ва 10.04.2026 йилдан кучга кирди.
Лола Абдуазимова
