Ахборот технологиялари ва коммуникацияларини ривожлантириш вазири томонидан Ахборот технологиялари соҳасидагн хорижий инвесторлар ва мутахассисларга, шунингдек Дастурий маҳсулотлар ва ахборот технологиялари технологик парки резидентларининг таъсисчилари (иштирокчилари)га тавсия бериш тартиби тўғрисидаги низом тасдиқланди (рўйхат рақами 3387, 16.09.2022 й.).
Тавсия:
- Ўзбекистон ҳудудида ахборот технологиялари соҳасини ривожлантириш учун инвестиция киритаётган хорижий инвесторга ва ахборот технологиялари соҳасида охирги 12 ойда йиллик даромади 30 минг АҚШ доллари эквивалентидан кам бўлмаган хорижий мутахассисга;
- Технопарк резидентларининг таъсисчиси (иштирокчиси)га берилади.
Низом қуйидаги тартибни белгилайди:
- тавсия олиш учун ариза ва ҳужжатларни бериш;
- аризани кўриб чиқиш;
- тавсиядан фойдаланиш, унинг амал қилиш муддатини узайтириш ва бекор қилиш;
- Тавсияларнинг ягона электрон реестрини юритиш.
Тавсияни бериш тўғрисидаги ариза ва бошқа ҳужжатлар келиб тушган кундан бошлаб 30 календарь кундан ошмаган муддат ичида Дирекция томонидан кўриб чиқилади.
Ҳужжат Қонун ҳужжатлари маълумотлари миллий базасида эълон қилинган ва 1.10.2022 йилдан кучга киради.
Лола Абдуазимова.
