Коррупцияга қарши курашиш бўйича комиссияга Бош прокурор бошчилик қилади

Давлат дастури коррупцияга қарши курашиш соҳасининг беш устувор йўналишлари бўйича тадбирларни ўз ичига олган:

• коррупцияга қарши курашиш соҳасида қонун ҳужжатларини янада такомиллаштириш;
• аҳолининг ҳуқуқий онги ва ҳуқуқий маданиятини юксалтириш, жамиятда коррупцияга нисбатан муросасиз муносабатни шакллантириш;
• давлат ва жамият ҳаётининг барча соҳаларида коррупциянинг олдини олиш бўйича чора-тадбирлар;
• коррупцияга оид ҳуқуқбузарликларни ўз вақтида аниқлаш, уларга чек қўйиш, уларнинг оқибатларини, уларга имкон берувчи сабаблар ва шарт-шароитларни бартараф этиш;
• коррупцияга қарши курашиш соҳасида ташкилий чоралар, тадқиқотлар ўтказиш, халқаро ҳамкорлик.

Дастурни рўёбга чиқариш доирасида давлат хизмати тизимини яратиш ва унинг фаолияти асосий тамойилларини, давлат хизматининг кадрлар таркибини шакллантиришга, давлат хизматига ишга киришга бўлган талабларни, уни ўташни ва якунлашни тартибга солувчи «Давлат хизмати тўғрисида»ги қонун (1.10.2017 йил) лойиҳасини ишлаб чиқиш кўзда тутилган.

Бундан ташқари, 1.07.2017 йилгача бўлган муддат ичида “Давлат харидлари тўғрисида”ги қонун лойиҳаси ишлаб чиқилиши керак бўлиб, унда қуйидагилар кўзда тутилади:

• давлат харидларини рақобат асосида амалга оширишнинг шаффоф ва очиқ механизми, ушбу соҳада коррупциянинг олдини олиш чоралари;
• давлат харидларига кичик бизнес ва хусусий тадбиркорлик субъектларини кенг жалб қилиш;
• давлат харидлари иштирокчилари учун шикоят қилишнинг мустақил ва самарали тизими ҳамда тартибини яратиш;
• электрон харидларни янада ривожлантириш ва бошқалар.

Худди шу санагача давлат органларининг коррупцияга қарши курашиш борасидаги фаолияти устидан жамоат назоратини амалга ошириш бўйича муносабатларини тартибга солувчи «Жамоат назорати тўғрисида»ги қонун лойиҳасини ишлаб чиқиш ҳам кўзда тутилган.

1 октябргача бўлган муддат ичида муқаддам эълон қилинган лойиҳалар —«Маъмурий тартиб-таомиллар тўғрисида»ги ҳамда «Давлат ва хусусий шериклик тўғрисида»ги қонун лойиҳаси устида олиб борилаётган ишларни якунига етказиш режалаштирилган.

Шунингдек, коррупцияга қарши норматив-ҳуқуқий ҳужжатлар пакетига «Ҳуқуқий ахборотни тарқатиш ва ундан фойдаланишни таъминлаш тўғрисида»ги (1.07.2017 й.) ҳамда «Жабрланувчилар, гувоҳлар ва жиноят процессининг бошқа иштирокчиларини ҳимоя қилиш тўғрисида»ги (1.01.2018 й.) қонун лойиҳалари кирган.

***

Қарор билан Коррупцияга қарши курашиш бўйича республика идоралараро комиссияси шахсий таркиби тасдиқланган бўлиб, унга Бош прокурор бошчилик қиладиган бўлди.

Республика комиссияси тўғрисидаги низомда унинг асосий вазифалари, ҳуқуқ ва мажбуриятлари, шунингдек фаолиятини ташкил этиш ўз аксини топди.

Таъкидланишича, комиссия фаолиятини доимий асосда амалга оширади ва ўз мажлисларини заруратга қараб, аммо чоракда камида бир марта ўтказади. Комиссиянинг қарорлари мажлисда қатнашган комиссия аъзоларининг оддий кўпчилик овози билан қабул қилинади ва баённома билан расмийлаштирилади. Комиссия қарорлари мажлисда иштирок этган комиссия аъзолари томонидан имзоланади, кейин уни раис ёки унинг ўринбосари тасдиқлайди.

Комиссия мажлисларига давлат органлари, бошқа ташкилотлар вакиллари, коррупцияга қарши курашиш бўйича ҳудудий идоралараро комиссиялар раҳбарлари таклиф этилиши мумкин.

Комиссиянинг ишчи органи функциясини Бош прокуратура бажаради, у қуйидагиларни амалга оширади:

• комиссия фаолиятини моддий-техника жиҳатидан таъминлаш;
• комиссия иш режасини ишлаб чиқиш, унинг ижросини назорат қилиш, шунингдек комиссиянинг кундалик фаолиятини тасдиқланган режага мувофиқ ташкил этиш;
• вазирликлар, давлат қўмиталари ва идоралар, маҳаллий давлат ҳокимияти органлари, фуқароларнинг ўзини ўзи бошқариш органлари, жамоат бирлашмалари ва бошқа ташкилотлар билан биргаликда комиссиянинг қабул қилинган қарорлари ижросини назорат ва мониторинг қилиш, комиссия раисига тегишли ахборот ва таклифларни киритиш;
• келиб тушаётган хат ва ҳужжатларни кўриб чиқиш ва комиссия ваколатига кирадиган масалалар юзасидан қарорлар тайёрлаш;
• Президент ва Вазирлар Маҳкамасига коррупцияга қарши курашишга имкон берадиган чора-тадбирларни такомиллаштириш бўйича таклифлар тайёрланишини ва киритилишини ташкил этиш.

Мазкур ҳужжатнинг тўлиқ матни билан, у билан боғланган бошқа қонун ҳужжатларига шарҳлар ва ҳаволалар билан яқин кунларда «Ўзбекистон Республикаси қонунчилиги» ахборот-қидирув тизимида танишиш мумкин.

Олег ЗАМАНОВ,

экспертимиз.

Мавзуга оид материаллар:

Коррупцияга қарши ким қандай курашади 

НҲҲ лойиҳалари: Маъмурий тартиб-таомиллар тўғрисида Қонун

Ўзбекистонда пуллик йўллар пайдо бўладими?