Юридик ва жисмоний шахслар томонидан валюта операциялари амалга оширилишининг асосланганлиги юзасидан мониторинг олиб бориш тартиби тўғрисидаги низомга ўзгартиришлар киритилди. ДСҚ, ДБҚ ва Марказий банкнинг қўшма қарори Адлия вазирлигида 7 ноябрь куни рўйхатдан ўтказилди, деб хабар беради идоранинг ахборот хизмати.
Люксембург Буюк Герцоглиги Имтиёзли солиқ режимини тақдим қилувчи ва (ёки) молиявий операцияларни амалга оширишда улар ҳақидаги маълумотларни ошкор этмасликни ва тақдим қилмасликни кўзда тутувчи давлатлар ва ҳудудлар (оффшор ҳудудлар) рўйхатидан чиқариб ташланди.
2015 йилда Иқтисодий ҳамкорлик ва тараққиёт ташкилотининг (ИҲТТ) солиқ солиш мақсадларида шаффофлик ва ахборот алмашиш бўйича Глобал форуми Люксембургни мазкур ташкилотнинг «талабларига етарли даражада мувофиқ келувчи» давлат деб тан олиши бунга сабаб бўлди.
Шу тариқа, тижорат банклари томонидан мижозларнинг Люксембургда рўйхатдан ўтган, шунингдек норезидентларнинг ушбу давлатда жойлашган банклардаги ҳисобварақларига шартнома бўйича товарлар (ишлар, хизматлар) импорти юзасидан тўлов амалга оширилиши устидан мониторинг олиб борилмайди.
Мазкур ҳужжатнинг тўлиқ матни билан, у билан боғланган бошқа қонун ҳужжатларига шарҳлар ва ҳаволалар билан «Ўзбекистон Республикаси қонунчилиги» ахборот-қидирув тизимида танишиш мумкин.
