Марказий банк Бошқарувининг қарори (13.06.2018 йилда 2093-9-сон билан рўйхатдан ўтказилган) билан Микрокредит ташкилотлари фаолиятини лицензиялаш тартиби тўғрисидаги низомга тегишли тузатишлар киритилди.
Таҳририятдан: ушбу ҳужжат ва 75 000 та бошқа норматив-ҳуқуқий ҳужжатлар тушунтиришлари билан бирга «ЎзР қонунчилиги» АҚТда жамланган. Намойиш версиясини бу ерда юклаб олинг (32,1 МБ).
Эслатиб ўтамиз, микрокредит ташкилотлари шу жумладан микрокредит, микроқарз ва микролизинг бериш соҳасида микромолиявий хизматлар кўрсатадилар.
Биринчидан, микрокредит ташкилотининг (бундан кейин – МТ) филиалини ташкил этиш учун талаблар рўйхати қисқартирилди. Бунинг учун илгари мажбурий ҳисобланган лицензия олинган кундан бошлаб камида 2 йил ўз фаолиятини амалга ошириш талаби бекор қилинди. Энди филиалнинг нақд пул ва қимматликлар билан боғлиқ фаолиятини амалга оширишда фақат хона ва ускуна мавжуд бўлиши зарур.
Иккинчидан, МТнинг филиал ташкил қилиш учун қониқарли молиявий ҳолатини баҳолаш мезонлари соддалаштирилди.
а) Жами капиталдан устав фонди ва текинга олинган мулклар чегирилгандан сўнг капитал охирги бир йил давомида унинг активларининг камида 10%ини ташкил этиши шарти мавжуд рўйхатдан чиқариб ташланди.
б) Илгари МТнинг ҳолатини қониқарли деб топиш учун муддати ўтган кредитларнинг суммаси охирги бир йил давомида унинг кредит портфелининг 5%идан кам миқдорини ташкил этиши зарур эди. Энди охирги 6 ой давомида тўлов муддати 30 кундан ортиқ кечиктирилган муддати ўтган кредитларнинг суммаси ҳисобга олинади.
Жорий йил натижаларига кўра соф фойдага эга бўлиш шарти ўзгартирилмай қолдирилди.
Учинчидан, МТ филиалини ташкил этиш учун энди МБга филиал тўғрисида низом, шунингдек филиал бош бухгалтери лавозимига кўрсатилган номзодлар тўғрисидаги маълумотларни (фақат раҳбар лавозимига номзодлар тўғрисидаги маълумотлар кўрсатилади) тақдим этиш керак эмас.
Филиал касса хоналарининг техник жиҳатдан мустаҳкамланганлиги ва қўриқлаш-ёнғиндан сақлаш сигнализация воситалари билан жиҳозланганлиги бўйича МБ ҳудудий бошқармасининг хулосаси фақат нақд пул ва қимматликлар билан фаолият юритиш режалаштирилганда тақдим этилади.
Ҳужжат Қонун ҳужжатлари маълумотлари миллий базасида эълон қилинган ва 14.06.2018 йилдан кучга кирди.
Ленара Хикматова.
