Президентнинг 15.06.2022 йилдаги фармойиши билан 2022/2023 ўқув йили учун давлат олий таълим муассасаларига ўқишга қабул қилишнинг давлат буюртмаси параметрлари тасдиқланди. Ҳужжат ЎзАда эълон қилинган.
Ёшларни олий таълим билан янада кенгроқ қамраб олиш, олий таълим ташкилотлари ўртасида соғлом рақобатни кучайтириш мақсадида 2022/2023 ўқув йили учун давлат олий таълим муассасаларига ўқишга қабул қилишнинг давлат буюртмаси параметрлари тасдиқланди:
- бакалаврлар тайёрлаш бўйича:
- кундузги таълим шаклига – 77 477 нафар;
- сиртқи таълим шаклига – 26 095 нафар;
- кечки таълим шаклига – 3 725 нафар;
- масофавий таълим шаклига – 3 410 нафар;
- магистрлар тайёрлаш бўйича – 10 688 нафар.
Молиявий мустақиллик берилган давлат олий таълим муассасаларининг кузатув кенгашларига ҳамда қабул параметрларини Васийлик кенгаши қарори билан тасдиқлаш ваколати берилган олий таълим ташкилотларига тегишли қабул параметрларини 2022 йил 20 июнга қадар тасдиқлаш тавсия этилди.
Лола Абдуазимова.
