Вазирлар Маҳкамасининг 26.11.2025 йилдаги "Қишлоқ хўжалигига мўлжалланган ерларнинг норматив қийматини аниқлаш тартибини янада такомиллаштириш чора-тадбирлари тўғрисида"ги 744-сон қарори қабул қилинди.
Қишлоқ хўжалигига мўлжалланган ерларнинг норматив қийматини аниқлаш тартиби тўғрисидаги низом тасдиқланди. У Қишлоқ хўжалиги вазирлигининг "Рақамли қишлоқ хўжалиги" ягона интеграциялашув платформасида (Агропортал) қишлоқ хўжалигига мўлжалланган ерлардаги шудгорлар, боғлар, узумзорлар ва кўп йиллик дарахтзорлар ҳамда уларда етиштириладиган қишлоқ хўжалиги экинлари турлари тўғрисидаги маълумотларни шакллантириш ва янгилаб боришни назарда тутади.
Агропортал маълумотлари қишлоқ хўжалиги ишлаб чиқарувчилари ер участкаларининг норматив қийматини аниқлаш учун асос сифатида қабул қилинади. Норматив қийматни Қишлоқ хўжалиги вазирлигининг "Ўздаверлойиҳа" давлат илмий-лойиҳалаш институти белгилайди.
Қишлоқ хўжалиги ерларидаги ҳайдаладиган ерлар, боғлар, узумзорлар ва бошқа кўп йиллик дарахтзорлар ҳамда ушбу ерларда етиштириладиган қишлоқ хўжалиги экинлари турлари тўғрисидаги маълумотлар ҳудудий қишлоқ хўжалиги бошқармалари ҳамда "Ўздаверлойиҳа" ва унинг ҳудудий бўлинмалари томонидан Агропорталга киритилади.
Агропорталга киритиладиган маълумотлар асосида қишлоқ хўжалиги товар ишлаб чиқарувчилари томонидан қишлоқ хўжалиги ишлаб чиқаришини юритиш учун мўлжалланган ер участкаларининг норматив қиймати "Ўздаверлойиҳа" ва унинг ҳудудий бўлинмалари томонидан Давлат бюджети маблағлари ҳисобидан аниқланади.
Қишлоқ хўжалигига мўлжалланган бир гектар ернинг норматив қийматини формула бўйича аниқлаш учун қуйидаги кўрсаткичлардан фойдаланилади:
- ер участкасининг қишлоқ хўжалигига мўлжалланган ер турлари;
- тупроқ бонитет кўрсаткичлари;
- қишлоқ хўжалиги экинлари, кўп йиллик дарахтлар ва озуқа экинларининг меъёрий ҳосилдорлиги;
- базавий ҳисоблаш миқдори;
- фойда рентабеллиги;
- ер участкасининг ижара муддати;
- туман коэффициенти;
- сув билан таъминланганлик коэффициенти;
- ҳосил нобудгарчилигини ҳисобга олиш коэффициенти;
- қишлоқ хўжалиги экин турлари ҳосилдорлигининг меъёрий коэффициенти.
"Ўздаверлойиҳа" норматив қиймат тўғрисидаги ахборотни "Электрон ҳукумат" тизимининг Идоралараро интеграциялашув платформаси орқали Солиқ қўмитасига тақдим этади.
Ҳужжат Қонун ҳужжатлари маълумотлари миллий базасида эълон қилинган ва 01.01.2026 йилдан кучга киради.
Лола Абдуазимова
