Вазирлар Маҳкамасининг 07.07.2025 йилдаги "Ҳудудларда кооперацияларни ташкил этиш орқали аҳолининг даромад манбаларини кўпайтириш чора-тадбирлари тўғрисида"ги 414-сон қарори қабул қилинди.
Маҳаллаларда кооперация тизимини ташкил этиш орқали шахсий ёрдамчи ва деҳқон (фермер) хўжаликлари ерларидан самарали фойдаланиш, уларнинг даромадлилигини янада оширишга эришиш режалаштирилган. Бунинг учун ҳужжат билан аҳоли даромадлари манбаларини кўпайтириш ва ишсизликни бартараф этишнинг устувор йўналишлари белгиланди:
- маҳаллаларда ихтисослашув йўналишларини белгилаш, янги лойиҳаларни амалга ошириш;
- ўзини ўзи банд қилишни кенгайтириш;
- тадбиркорлик фаолияти асосларини ўргатиш;
- аҳолини имтиёзли кредитлаш асосида ишлаб чиқариш учун зарур бўлган асбоб-ускуналар ва хомашё билан таъминлаш, шунингдек, ишлаб чиқарилган (етиштирилган) маҳсулотни сотишга кўмаклашиш ва бошқалар.
АТ “Халқ банки”, “Микрокредитбанк”, ”Туронбанк” ва "Алоқабанк" тижорат банклари 2025 йилда деҳқон (фермер) хўжаликлари ва томорқа ерларида қишлоқ хўжалиги маҳсулотларини кооперация асосида етиштириш (етиштириш) (балиқчилик, қуёнчилик, чорвачилик, паррандачилик, асаларичилик) ҳамда маҳсулотларни харид қилиш учун 500 млрд сўм миқдорида кредитлар ажратади.
Кооперация асосида аҳоли даромадларини ошириш мақсадида кооперативларни ташкил этаётган кичик ва ўрта тадбиркорлик субъектларига банк кредитлари бўйича фоиз харажатларининг бир қисмини компенсация қилиш назарда тутилмоқда.
Бунда, "Тадбиркорликни ривожлантириш компанияси" АЖ томонидан ҳудудлар тоифасидан келиб чиқиб, миллий валютада 5 млрд сўмгача бўлган кредитлар бўйича Марказий банк асосий ставкасидан 4 фоизлик пункт юқори ва базавий ставканинг 1,75 фоизидан кўп бўлмаган миқдорда ҳамда 3 йилдан кўп бўлмаган муддатга базавий ставканинг 40 фоизигача бўлган кредитлар бўйича фоиз харажатлари компенсация қилинади.
Ҳужжат Қонун ҳужжатлари маълумотлари миллий базасида эълон қилинган ва 07.07.2025 йилдан кучга кирди.
Лола Абдуазимова
