Спорт тури қандай эътироф этилади?

Янги Низом эскисидан қуйидаги жиҳатлар билан фарқланади.

Эндиликда спорт турларини (спорт турининг тармоқларини) эътироф этиш ва Спорт турлари реестрига киритиш учун Маданият ва спорт ишлари вазирлигига қуйидаги ҳужжатларни тақдим этиш шарт эмас:

спорт федерацияси (уюшмаси), жисмоний тарбия-спорт ташкилотининг давлат рўйхатидан ўтказилганлиги тўғрисидаги гувоҳноманинг тасдиқланган нусхаси;

спорт федерацияси (уюшмаси)нинг халқаро спорт ташкилотига аъзо бўлганлиги тўғрисидаги (агар аъзо бўлса) ҳужжатнинг нусхаси ва унинг ўзбек тилидаги тасдиқланган таржимаси.

Спорт турлари (спорт турининг тармоқлари)ни эътироф этиш учун ушбу спорт тури, илгаригидек, Ўзбекистоннинг камида 4 та минтақасида ривожланган бўлиши керак. Бироқ қишки, ўқ отиш ва гольф спорт турларига (илгари – фақат қишки спорт турларига) бундай талаб қўйилмайди.

Белгиланишича, Маданият ва спорт ишлари вазирлиги Спорт турлари реестрини электрон ҳужжат кўринишида юритади ва унинг нусхасини ўзининг расмий веб-сайтида (www.mcs.uz) жойлаштиради.

Ҳужжат давлат тилида қабул қилинган.

Буйруқ 2016 йил 17 октябрда кучга кирди.

Мазкур ҳужжатнинг матни билан, у билан боғланган бошқа қонун ҳужжатларига шарҳлар ва изоҳлар билан «Ўзбекистон Республикаси қонунчилиги» ахборот-қидирув тизимида танишиш мумкин.

«Ўзбекистон Республикаси қонунчилигида янги» шарҳини

эксперт-юристимиз Сардор ЖУМАШОВ

тайёрлади.