Вазирлар Маҳкамасининг 07.10.2025 йилдаги "Расмий статистика фаолиятини тартибга солувчи норматив-ҳуқуқий ҳужжатларни тизимлаштириш тўғрисида"ги 627-сон қарори қабул қилинди.
Ҳужжат билан қуйидагилар тасдиқланган:
- Расмий статистикани тайёрловчиларнинг статистика услубиётларини аудитдан ўтказиш тартиби тўғрисидаги низом;
- Ўзбекистон Республикаси Миллий статистика қўмитасининг махсус жамғармаси тўғрисидаги низом.
Расмий статистикани тайёрловчиларнинг статистика маълумотларини тайёрлаш билан боғлиқ фаолиятида қўллайдиган услубий ҳужжатларнинг халқаро тавсияларга мувофиқлигини баҳолаш бўйича аудити кўп йиллик ва бир йиллик статистика дастурларига киритилган расмий статистикани тайёрловчилар томонидан амалга оширилади.
Текширув ҳар йили тасдиқланадиган режа-жадвалга мувофиқ Миллий статистика қўмитаси томонидан ташкил этилади. Бунда статистика фаолиятини амалга оширувчи субъектларнинг статистика фаолияти услубиёти ҳар беш йилда камида бир марта ўтказилади.
Махсус жамғарманинг асосий вазифалари:
- статистика органларининг моддий-техника базасини ривожлантириш ва мустаҳкамлаш;
- статистика органлари мутахассисларининг малакасини ошириш, уларни тайёрлаш ва қайта тайёрлаш;
- ходимларни моддий рағбатлантириш;
- замонавий ахборот технологияларини жорий этиш ва ривожлантириш ва бошқалар.
Махсус жамғарма маблағлари давлат статистика ҳисоботини тақдим этиш тартибини бузганлик, ҳисобот маълумотларини бузиб кўрсатганлик ёки ҳисоботларни тақдим этиш муддатларини бузганлик учун мансабдор шахсларга қонун ҳужжатларига мувофиқ солинадиган маъмурий жарималар ҳисобидан шакллантирилади.
Ҳужжат Қонун ҳужжатлари маълумотлари миллий базасида эълон қилинган ва 07.10.2025 йилдан кучга кирди.
Лола Абдуазимова
