Вазирлар Маҳкамасининг 08.08.2023 йилдаги “Умра” тадбирларини ташкил этиш ва ўтказишда зиёратчиларнинг манфаатларини самарали ҳимоя қилиш бўйича қўшимча чора-тадбирлар тўғрисида”ги 345-сон қарори қабул қилинди.
Умра тадбирларини ташкил этиш ва ўтказишга оид хизматларни кўрсатиш билан боғлиқ туристик фаолиятни амалга ошириш лицензияси чиқиш туризми кичик турининг алоҳида фаолият йўналиши ҳисобланади ҳамда мазкур фаолият фақат маҳаллий туроператор томонидан амалга оширилади.
“Умра” хизматларини кўрсатиш фаолияти бўйича қуйидаги қўшимча лицензия талаблари ва шартлари белгиланди:
- 100 минг АҚШ доллари эквивалентидан кам бўлмаган миқдордаги маблағларни Туризм қўмитасининг Хавфсиз туризм жамғармасига захира қилиб қўйиш;
- “Умра” хизматлари давомида зиёратчиларнинг гуруҳ раҳбари этиб Ўзбекистон мусулмонлари идораси билан тузиладиган шартнома асосида унинг диний билим ва кўникмаларга эга бўлган мутахассисларини тайинлаш;
- “Умра” хизматларини кўрсатувчи туроператор штатида диний (исломий) таълим йўналишлари бўйича республика таълим муассасаси ёки Ўзбекистон халқаро ислом академиясининг тегишли бакалавриат таълим йўналиши ёхуд магистратура мутахассислиги битирувчиси бўлган камида бир нафар мутахассиснинг бўлиши;
- “Умра” хизматларини вояга етмаган фуқароларга кўрсатмаслик;
- “Умра” хизматларини Саудия Арабистони Подшоҳлигидаги ҳамкор ташкилот ўртасида имзоланадиган шартномага мувофиқ амалга ошириш.
Туроператор мурожаати асосида Ўзбекистон мусулмонлари идораси мутахассиси зиёратчиларга гуруҳ раҳбари (элликбоши) сифатида жалб этилади. Бунда:
- мутахассис туроператорнинг сўровига кўра Ўзбекистон мусулмонлари идораси томонидан уч иш кунида ажратилади;
- мутахассиснинг зиёратчилар гуруҳларига раҳбарлик қилиши билан боғлиқ хизмати беғараз амалга оширилади, унинг сафар харажатлари (транспорт, меҳмонхона, озиқ-овқат, суғурта, виза тўловлари ва бошқалар) “Умра” хизматларини кўрсатувчи туроператор томонидан қопланади.
2023 йил 1 октябрдан бошлаб “Умра” хизматларини кўрсатувчи туроператорлар фаолиятини рейтинг асосида баҳолаш тизими жорий этилади.
Мазкур қарорда белгиланган қўшимча лицензия талаб ва шартлари 2023 йил 1 ноябрдан бошлаб қўлланилади. Лицензияни қайта расмийлаштиришда тўлов ундирилмайди.
Ҳужжат Қонун ҳужжатлари маълумотлари миллий базасида эълон қилинган ва 08.08.2023 йилдан кучга кирди.
Лола Абдуазимова.
