Ўзбекистонда «Ўзагроэкспортбанк» пайдо бўлади

Янги тижорат банкининг муассислари таркибига қуйидагилар кирди:

• Ўзбекистон Тикланиш ва тараққиёт жамғармаси – 75%;
• «Ўзбекинвест» МЭИСК– 10%;
• «Ўзбекозиқовқатхолдинг» ХК – 5%;
• «Ўзагросуғурта» АЖ – 5%;
• «Кафолат СК» АЖ – 5%.

Ўзагроэкспортбанк» акциядорлик тижорат банкининг бошланғич устав капитали миқдори эквиваленти 10,0 миллион евродан иборат. Ўзбекистоннинг резидентлари ва норезидентлари, шу жумладан халқаро молия институтлари банк акциядорлари бўлишлари мумкин.

Банкнинг асосий вазифалари қаторига агросаноат маҳсулотлари, энг аввало мева-сабзавот маҳсулотлари етиштириш ва экспорт қилишни ривожлантириш бўйича инвестиция лойиҳаларини устувор даражада молиялаштириш, шунингдек агросаноат тармоқлари ташкилотларига ва унинг инфратузилмасига комплекс равишда кредит-ҳисоб-китоб хизматлари кўрсатиш киради.

Янги ташкил этилган «Ўзагроэкспортбанк» АТБ ва унинг филиаллари давлат рўйхатига олинган санадан бошлаб 5 йил муддатга барча турдаги солиқлар ҳамда давлат мақсадли жамғармаларига мажбурий ажратмалар тўлашдан озод қилинди, бўшаётган маблағлар банкнинг ресурс ва моддий-техника базасини мустаҳкамлашга мақсадли йўналтирилади.

Мазкур ҳужжатнинг тўлиқ матни билан, у билан боғланган бошқа қонун ҳужжатларига шарҳлар ва ҳаволалар билан яқин кунларда «Ўзбекистон Республикаси қонунчилиги» ахборот-қидирув тизимида танишиш мумкин.

Олег ЗАМАНОВ,
экспертимиз.