Президентнинг 16.08.2017 йилдаги ПҚ-3220-сон «Ўзсаноатэкспорт» АЖ фаолияти самарадорлигини янада ошириш чора-тадбирлари тўғрисида»ги қарори эълон қилинди. Ҳужжат матни давлат раҳбарининг сайтида келтирилган.
Қарор билан «Ўзсаноатэкспорт» АЖнинг асосий вазифалари ва фаолиятининг йўналишлари белгиланди. Чуқур маркетинг тадқиқотларини олиб бориш, маҳаллий ташкилотларга хорижий харидорларни топишда ёрдам бериш, хорижда ўтказилаётган тендер (танлов) савдолари, халқаро савдо-саноат кўргазмалари, ярмаркалар ва бошқаларда иштирок этиш кабилар шулар жумласидандир.
Шунингдек, ҳужжат билан компаниянинг ижро этувчи аппарати тузилмаси маъқулланди (бошқарув ходимлари – 40 нафар).
«Ўзсаноатэкспорт» АЖга қуйидаги ҳуқуқлар берилди:
- ўзининг хориждаги савдо уйлари манзилига озиқ-овқат буғдойидан фойдаланиш баланси билан тасдиқланган ҳажмлар доирасида консигнациялаш шарти билан озиқ-овқат уни ва буғдойини юклаб юбориш;
- компания томонидан олиб келинадиган ва «божхона ҳудудида қайта ишлаш» божхона режимига жойлаштирилган хомашё ва материалларни қайта ишлаш натижасида олинган маҳсулотларни жаҳон бозорларида сотиш учун кейинчалик четга чиқаришни амалга ошириш.
«Ўзсаноатэкспорт» АЖ томонидан ташқи савдо операциялари амалга оширилишида экспорт операциялари бўйича тушум тушиши ёки қайта олиб кириш муддати товарлар, ишлар ва хизматлар амалда экспорт қилинган кундан бошлаб 90 кундан ошмаслиги керак.
«Ўзсаноатэкспорт» АЖ Тошкент шаҳри, Юнусобод тумани, Амира Темур шоҳкўчаси, 109-уй манзилида жойлаштирилади.
Мазкур ҳужжатнинг тўлиқ матни билан, у билан боғланган бошқа қонун ҳужжатларига шарҳлар ва ҳаволалар билан «Ўзбекистон Республикаси қонунчилиги» ахборот-қидирув тизимида танишиш мумкин.
Олег Заманов,
экспертимиз.
