Вазирлар Маҳкамасининг 30.01.2018 йилдаги 66-сон қарори билан Жисмоний шахслар томонидан нақд хорижий валютани Ўзбекистон Республикасининг божхона чегараси орқали олиб кириш ва олиб чиқиб кетиш қоидалари тасдиқланди.
Ҳужжатнинг олдинги таҳрири Президентнинг 6.12.2017 йилдаги ПФ-5273-сон «Жисмоний шахслар томонидан нақд хорижий валютани олиб кириш ва олиб чиқиб кетиш тартибини янада соддалаштириш чора-тадбирлари тўғрисида»ги Фармонига мувофиқ келмаслиги боис ўз кучини йўқотди.
Эслатиб ўтамиз, йил бошидан олиб кирилаётган ва олиб чиқиб кетилаётган 2 000 АҚШ доллари эквивалентидан ортиқча миқдордаги нақд хорижий валютага декларация тўлдирилиши ва божхона органи ходимига тақдим этилиши лозим. Мамлакатимиздан эквиваленти 5 000 АҚШ долларига тенг ёки ундан ошмайдиган миқдордаги нақд хорижий валютани эркин олиб чиқиб кетиш мумкин (декларациялаш тўғрисидаги қоидаларга риоя қилган ҳолда). Ушбу суммадан ортиқча маблағни олиб чиқиб кетишда қуйидагилар талаб этилади:
- резидентлар томонидан — Ўзбекистон Республикаси Марказий банкининг рухсатномаси, унда олиб чиқиб кетиладиган нақд хорижий валютанинг жами суммаси кўрсатилади. Рухсатнома у берилган санадан бошлаб 3 ой мобайнида амал қилади (рухсатнома бериш тартиби – бу ерда);
- норезидентлар томонидан — Ўзбекистонга кириш чоғида тўлдирилган йўловчи божхона декларацияси. Улар илгари олиб кирган миқдорларидан ортиқ бўлмаган миқдордаги маблағни олиб чиқиб кетишлари мумкин.
Бу - муҳим! Кўрсатиб ўтилган нақд хорижий валютани олиб чиқиб кетишга рухсатнома ҳужжатларидан бир марта фойдаланилади. Масалан, агар фуқаро 10 000 АҚШ долларини олиб чиқиб кетишга МБдан рухсатнома олган бўлса, у чиқиб кетаётганида рухсатномани божхона органларига топширади ва тегишинча ундан қайта фойдалана олмайди. Худди шундай, норезидент мамлакатимизга 12 000 АҚШ долларини йўловчи божхона декларациясини тўлдирган ҳолда олиб кириб, қайтишда эса декларацияни кўрсатиб, 6 000 АҚШ долларини олиб чиқиб кетса, кейинги гал айнан шу декларация бўйича қолган 6 000 АҚШ долларини олиб чиқиб кета олмайди.
Шунингдек эслатиб ўтамиз, жорий йилнинг январида йўловчи божхона декларациясининг янги шакли тасдиқланди.
Ҳужжат Қонун ҳужжатлари маълумотлари миллий базасида эълон қилинган ва 1.02.2018 йилдан кучга кирди.
Мазкур ҳужжатнинг тўлиқ матни, шарҳлар ва у билан боғлиқ бошқа қонун ҳужжатларига ҳаволалар билан «Ўзбекистон Республикаси қонун ҳужжатлари» ахборот-қидирув тизимида танишиш мумкин.
Олег Заманов.
