Вазирлар Маҳкамасининг “Архитектура ва қурилиш соҳасидаги олий таълим муассасаларида сиртқи (махсус сиртқи) таълимни ташкил этиш чора-тадбирлари тўғрисида”ги қарори қабул қилинди. Бу ҳақда Адлия вазирлигига ҳавола билан ЎзА хабар беради.
Қарорга асосан 2018/2019 ўқув йилидан бошлаб Тошкент архитектура-қурилиш институти, Самарқанд давлат архитектура-қурилиш институти ва Наманган муҳандислик-қурилиш институтида сиртқи бўлим очилади.
Мазкур сиртқи бўлим абитуриентларига махсус талаблар қўйилади. Улар қуйидагиларга эга бўлишлари керак:
- архитектура ва қурилиш соҳасидаги ёки турдош таълим йўналиши бўйича ўрта махсус, касб-ҳунар маълумоти;
- таълим йўналишига мувофиқ соҳа, касб, лавозимларда камида 3 йиллик амалий иш стажи;
- Давлат архитектура ва қурилиш қўмитаси томонидан берилган тавсиянома.
Бунда абитуриентлар тест синовлари ва (ёки) касбий (ижодий) имтиҳондан ўтадилар. Ўқиш тўлов-контракт асосида ташкил этилади.
Мазкур ҳужжатнинг тўлиқ матни, шарҳлар ва у билан боғлиқ бошқа қонун ҳужжатларига ҳаволалар билан «Ўзбекистон Республикаси қонун ҳужжатлари» ахборот-қидирув тизимида танишиш мумкин.
Самир Латипов.
.png)
