Norma.uz портали 2025 йил 1 сентябрдан кучга кирадиган миллий қонунчиликдаги асосий ўзгаришлар бўйича шарҳни тақдим этади.
Иш берувчиларга қўйиладиган талаблар соддалаштирилмоқда
Хусусан, қуйидагилар бекор қилинади:
- бандлик органлари томонидан юбориладиган шахсларни ишга қабул қилишни рад этганлик учун маъмурий жавобгарлик;
- бўш иш ўринлари мавжудлиги тўғрисида ҳисоботларни мажбурий тақдим этиш.
Меҳнат инспекцияси текширувлари – олдиндан хабардор қилмасдан ўтказилади
Энди давлат меҳнат инспекторлари ваколатли органни олдиндан хабардор қилмасдан текширувлар ўтказиши мумкин.
Янги мақом: "яшил тадбиркор"
Тадбиркорлик субъектларига "яшил тадбиркор" мақоми берилади. Унинг эгаларига:
- "Шаффоф қурилиш" платформасида устунлик берилади;
- муайян даврга экологик текширувлардан озод этилади;
- халқаро бозорларга чиқишда қўллаб-қувватланади;
- Тадбиркорлик субъектларининг барқарорлик рейтинги доирасида қўшимча балл берилади.
Заргарлик буюмларини импорт қилиш шартлари енгиллаштирилмоқда
2028 йил 1 сентябрга қадар:
- заргарлик буюмларини олиб киришда божхона божи – 2 %;
- "эркин муомалага чиқариш" ва "экспорт" божхона режимларига расмийлаштириш – 1 БҲМ;
- импорт қилинган буюмларни тамғалаш учун йиғим маҳаллий ишлаб чиқарувчилар учун йиғимга тенглаштирилади;
- тасдиқловчи ҳужжатлари бўлмаган заргарлик буюмларини барча божларни тўлаган ҳолда декларация қилишга рухсат берилади.
Шунингдек ЯТТга заргарлик буюмларини сотиш фаолияти билан шуғулланишга рухсат берилади.
Ногиронликни белгилашнинг янги тизими жорий этилмоқда
Туманлараро ва туман (шаҳар) ТИЭКлари томонидан фақат тиббий ҳужжатлар асосида ногиронликни белгилаш бекор қилинади. Ногиронлик шахсларнинг соғлиғи ҳолати ва функционаллигини баҳолаш натижаларидан келиб чиқиб электрон тарзда белгиланади.
Кичик ва ўрта бизнесни ихтиёрий равишда тугатишда солиқ текшируви бекор қилинади
Агар бизнес барча учта шартга жавоб берса:
- 3 йилда даромад < 10 млрд сўм;
- қарздорлик мавжуд эмас ва ҳисоботлар мунтазам равишда топширилади;
- "Хавфни таҳлил қилиш" тизимида ҳуқуқбузарлик содир этиш хавфи паст,
– ихтиёрий равишда тугатишда солиқ текшируви ўтказилмайди.
Туризм субсидия ва компенсациялар билан қўллаб-қувватланади
Туризмни қўллаб-қувватлаш жамғармаси ҳисобидан (йилига 50 млрд сўм):
- видеоконтент ишлаб чиқариш ва илгари суриш харажатларининг 50 фоизи (50 млн сўмгача) қоплаб берилади;
- хорижий давлатларда ўзбек ошхонаси ресторанларини ташкил этиш субсидияланади (25 минг АҚШ долларигача);
- транспорт харажатлари (йилига 300 кг маҳсулотга 100 млн сўмгача) компенсация қилинади;
- меҳмонхона, савдо марказлари ва умумий овқатланиш шохобчаларида сузиш ҳавзаларини қуришга 100 млн сўмгача ажратилади.
Камбағал оилалар фарзандлари учун узайтирилган кун гуруҳлари – бепул
Уларга умумий ўрта таълим муассасасининг узайтирилган кун гуруҳларига қатнайдиган болалар умумий сонининг 15 фоизи миқдорида алоҳида квота ажратилади, шунингдек улар ота-оналар тўловидан озод этилади.
Соддалаштирилган иш юритишда даъволар бўйича янги чегаралар белгиланади
Соддалаштирилган иш юритиш тартибида даъво аризаси бўйича ишни кўриб чиқиш учун даъвонинг максимал баҳоси қуйидагиларни ташкил этади:
- юридик шахсларга нисбатан – БҲМнинг 150 бараваригача;
- якка тартибдаги тадбиркорларга нисбатан – БҲМнинг 100 бараваригача;
- жисмоний шахсларга нисбатан – БҲМнинг 50 бараваригача.
Мактаб директорлари ва уларнинг ўринбосарлари ставкалари оширилмоқда
Базавий тариф ставкалари қуйидагича оширилади:
- мактаб директорлари – 20 фоизга;
- директор ўринбосарлари – 15 фоизга;
- I ва II гуруҳга кирувчи МТТ директорлари ставкалари III ва IV гуруҳдаги мактаб директори ўринбосарлари ставкаларига тенглаштирилади.
Ёлғиз ота ва оналарга моддий ёрдам "Инсон" ва ЯИДХП орқали берилади
Энди моддий ёрдам учун аризани қуйидагича бериш мумкин:
- "Ягона миллий ижтимоий ҳимоя тизими" платформаси орқали;
- ЯИДХП орқали;
- ёки "Инсон" марказлари ва ДХМда.
ППХ хизматлари – шартномавий-ҳуқуқий асосда
ППХ бўлинмалари ИИВнинг "Электрон патруль" тизими орқали жамоат тартибини сақлаш ва жамоат хавфсизлигини таъминлаш бўйича хизматлар кўрсата бошлайди. Юридик шахслар шартнома асосида ЯИДХП ва ДХМ орқали хизмат учун мурожаат қилиши мумкин.
Қайта суғурта қилиш қоидалари ўзгармоқда
Мажбуриятларни хорижий қайта суғурта ташкилотларига беришдан олдин:
- аввал давлат органлари иштирокида тузилган ташкилотларга шартномаларни таклиф қилиш керак;
- кейин – Ўзбекистонда ишлаш ҳуқуқига эга бўлган бошқаларга бериш керак.
Миллий туризм ягона платформаси ишга туширилмоқда
У қуйидагиларни амалга ошириш имконини беради:
- меҳмонхоналар, экскурсиялар ва транспортни банд қилиш;
- чипталарни харид қилиш (авиа, темир йўл, автобус);
- миллий ва халқаро тўлов тизимлари орқали хизматлар учун тўловни амалга ошириш ва бошқалар.
