Tashabbuskorlar yigʻilishida yangi siyosiy partiyani tashkil etish, nomlash, shuningdek uning tashkiliy qoʻmitasini tasdiqlash toʻgʻrisidagi takliflar qoʻllab-quvvatlandi. Bu haqda OʻzA хabar berdi.
Oʻzbekiston Ekologik partiyasi kelajak avlodlar sogʻlom tabiiy muhitda yashashi imkoniyatini ta’minlash yoʻlidagi jamiyatning sa’y-harakatlarini birlashtiradi. Bu iqtisodiyot, ijtimoiy sohani barqaror rivojlantirish, shuningdek fuqarolar salomatligini muhofaza qilishga yoʻnaltirilgan tizimli islohotlarni oʻtkazish uchun muhim.
Tashkiliy qoʻmita partiyani tashkil etish, ta’sis hujjatlarini tayyorlash va boshqa tashkiliy-huquqiy masalalarni hal etish boʻyicha «yoʻl хaritasi»ni tayyorlaydi. U mazkur chora-tadbirlar kompleksi amalga oshirilishini ham ta’minlaydi.
Yangi siyosiy partiya Oʻzbekiston Ekologik harakati toʻplagan tajriba asosida tashkil etiladi. Oliy Majlis Qonunchilik palatasida Ekologik harakat uchun 15 ta deputat joyiga kvota ajratilgan. Bu ekologik holatni sogʻlomlashtirish va atrof muhitni muhofaza qilishda jamoatchilik ishtiroki faolligini oshirish imkonini berdi.