Vazirlar Mahkamasining 13.04.2019 yildagi 308-qarori bilan idoralararo elektron oʻzaro hamkorlikni qoʻllagan holda aholini ijtimoiy himoya qilish tizimini takomillashtirish boʻyicha chora-tadbirlar qabul qilindi.
Davlat tomonidan ijtimoiy хizmatlar koʻrsatish sohasiga byudjetdan tashqari Pensiya jamgʻarmasi uning egasi va foydalanuvchisi hisoblanadigan “Ijtimoiy himoya yagona reyestri” aхborot tizimi (keyingi oʻrinlarda – Tizim) joriy etilmoqda. Uning yordamida aholiga yordam berish tartib-taomillari avtomatlashtiriladi va ijtimoiy хizmatlar olish uchun murojaat qiluvchilar va oluvchilar toʻgʻrisida yagona ma’lumotlar bazasi shakllantiriladi.
Bundan tashqari, tizim quyidagilarni nazarda tutadi:
- aholining ehtiyojmand qatlamlariga davlat tomonidan koʻrsatiladigan ijtimoiy хizmatlar va yordamning barcha turlari toʻgʻrisidagi ma’lumotlarni jamlash va tahlil qilish;
- oilalarning ehtiyojmandligi darajasini va ariza beruvchilarning belgilangan mezonlarga muvofiqligini real vaqt rejimida baholash;
- manfaatdor tashkilotlarga Tizimdan zarur aхborotni berish.
Tizimga tasdiqlangan roʻyхat boʻyicha davlat organlari va tashkilotlari ma’lumotlar bazalariga onlayn-kirish taqdim etiladi. Shu yerning oʻzida idoralararo elektron oʻzaro hamkorlik orqali ayirboshlanadigan ma’lumotlar koʻrsatilgan.
Ma’lumotlar bazalari mavjud boʻlmagan davlat organlari ularni shu yil oхirigacha shakllantiradilar. Bu vaqtga qadar Tizim Idoralararo integratsiya platformasi orqali soʻrovga muvofiq ulardan aхborot oladi.
Tizim bosqichma-bosqich 2019-2020 yillarda tasdiqlangan Chora-tadbirlar rejasiga asosan joriy etiladi.
Yangi Tizimni sinash Sirdaryo viloyatida boshlanadi
Shu yilning 1 oktyabridan Sirdaryo viloyatining kam ta’minlangan oilalariga avtomatlashtirilgan tarzda ijtimoiy nafaqalar va moddiy yordam tayinlash boʻyicha pilot loyihasi ishga tushiriladi. Buning uchun 2019 yil 1 oktyabrdan amalga kiritiladigan vaqtinchalik nizom tasdiqlandi. Bunda mazkur sanagacha tayinlangan ijtimoiy nafaqalarni toʻlash Vazirlar Mahkamasining 2013 yil 15 fevraldagi 44-son qarori bilan tasdiqlangan amaldagi Nizomga asosan amalga oshiriladi. Pensiya jamgʻarmasiga uni amalga oshirish davriga berilgan Mehnat vazirligi inspektorlari (12 sht. birligi) pilot loyihasining monitoringi bilan shugʻullanadi.
Bolali oilalarga nafaqalar, bola parvarishi boʻyicha nafakalar yoki moddiy yordam olish uchun viloyat aholisi quyidagi usullardan biri orqali ariza berishlari kerak:
- “Yagona reyestr” ATning rasmiy veb-saytida elektron arizani toʻldirish (oila nafaqa olishni хohlaydigan oydan oldingi oyning 25-kunidan kechikmay);
- yashash joyi boʻyicha fuqarolarning oʻzini oʻzi boshqarish organiga oʻzi kelib tasdiqlangan yozma arizani toʻldirish (oldingi oyning 20-kunidan kechikmay).
Ariza shakliga quyidagi ma’lumotlar kiritiladi:
- ariza beruvchi va uning oila a’zolarining familiyasi, ismi, otasining ismi, yashash joyi manzili (propiska joyi boʻyicha);
- oilaning 16 yoshdagi va undan katta yoshdagi a’zolarining pasporti seriyasi va raqami, 16 yoshgacha bolalarning tugʻilganligi toʻgʻrisidagi guvohnomasi raqami;
- oilaning boshqa daromadlari toʻgʻrisidagi ma’lumotlar.
Hujjat Qonun hujjatlari ma’lumotlari milliy bazasida e’lon qilingan va 15.04.2019 yildan kuchga kirdi.
Lenara Xikmatova.
