Prezidentning 15.10.2025 yildagi PQ-303-son qarori bilan zargarlik sohasida faoliyat yuritayotgan tadbirkorlik sub’yektlarini yanada qoʻllab-quvvatlash, shuningdek, aholining yuqori sifatli mahalliy zargarlik buyumlariga boʻlgan talabini qondirish choralari belgilangan.
Qimmatbaho metallarni birja savdolari orqali va toʻgʻridan-toʻgʻri shartnomalar boʻyicha sotishda taqdim etiladigan chegirmalarning amal qilish muddati 2029 yil 1 fevralgacha uzaytiriladi. Eslatib oʻtamiz, chegirmalar Prezidentning 23.12.2022 yildagi PQ-452-son qaroriga muvofiq taqdim etilgan.
2026 yil 1 fevraldan mazkur chegirmalardan foydalanadigan zargarlik buyumlari ishlab chiqaruvchi tadbirkorlik sub’yektlari roʻyхatini shakllantirishda quyidagi qoʻshimcha mezonlar hisobga olinadi:
- tashkil etilgan yangi ish oʻrinlariga (mashgʻulotlarning хalqaro standart klassifikatori - MSKZ - 08, kod 7313) ishga qabul qilingan zargarlar bilan belgilangan tartibda mehnat shartnomasini tuzish, ularga MHTEKMning 4 baravaridan kam boʻlmagan miqdorda ish haqi hisoblash (soliq organlari tomonidan tasdiqlangan holda);
- tadbirkorlik sub’yektining zargarlik markazlarida kamida bir oy davomida faoliyat yuritishi.
Shuningdek, oltinni birja savdolari orqali va toʻgʻridan-toʻgʻri shartnomalar asosida sotish hajmini oshirish choralarini koʻrish rejalashtirilgan.
Hujjat Qonun hujjatlari ma’lumotlari milliy bazasida e’lon qilingan va 15.10.2025 yildan kuchga kirdi.
Lola Abduazimova
