Президентнинг 15.10.2025 йилдаги ПҚ-303-сон қарори билан заргарлик соҳасида фаолият юритаётган тадбиркорлик субъектларини янада қўллаб-қувватлаш, шунингдек, аҳолининг юқори сифатли маҳаллий заргарлик буюмларига бўлган талабини қондириш чоралари белгиланган.
Қимматбаҳо металларни биржа савдолари орқали ва тўғридан-тўғри шартномалар бўйича сотишда тақдим этиладиган чегирмаларнинг амал қилиш муддати 2029 йил 1 февралгача узайтирилади. Эслатиб ўтамиз, чегирмалар Президентнинг 23.12.2022 йилдаги ПҚ-452-сон қарорига мувофиқ тақдим этилган.
2026 йил 1 февралдан мазкур чегирмалардан фойдаланадиган заргарлик буюмлари ишлаб чиқарувчи тадбиркорлик субъектлари рўйхатини шакллантиришда қуйидаги қўшимча мезонлар ҳисобга олинади:
- ташкил этилган янги иш ўринларига (машғулотларнинг халқаро стандарт классификатори - МСКЗ - 08, код 7313) ишга қабул қилинган заргарлар билан белгиланган тартибда меҳнат шартномасини тузиш, уларга МҲТЭКМнинг 4 бараваридан кам бўлмаган миқдорда иш ҳақи ҳисоблаш (солиқ органлари томонидан тасдиқланган ҳолда);
- тадбиркорлик субъектининг заргарлик марказларида камида бир ой давомида фаолият юритиши.
Шунингдек, олтинни биржа савдолари орқали ва тўғридан-тўғри шартномалар асосида сотиш ҳажмини ошириш чораларини кўриш режалаштирилган.
Ҳужжат Қонун ҳужжатлари маълумотлари миллий базасида эълон қилинган ва 15.10.2025 йилдан кучга кирди.
Лола Абдуазимова
