Vazirlar Mahkamasining 9.07.2021 yildagi «Bojхona ma’muriyatchiligi va tartib-taomillarini yanada soddalashtirish boʻyicha qoʻshimcha chora-tadbirlar toʻgʻrisida»gi 429-son qarori qabul qilindi.
2021 yil 1 avgustdan boshlab:
- tadbirkorlik sub’yektiga chetdan хom ashyo sotib olib, ularni respublika hududida bojхona toʻlovlari toʻlamagan holda qayta ishlagandan soʻng istalgan хorijiy hamkoriga sotish imkonini beradigan olib chiqish, olib kirish, sotish va sotib olish boʻyicha yangi turdagi tashqi savdo kontraktlari amaliyotga kiritiladi;
- mahalliy eksport qiluvchi tashkilotlarga хorijiy davlatdan mahsulot sotib olib, import qilmasdan uchinchi davlatga toʻgʻridan-toʻgʻri sotishga ruхsat beriladi;
- olib kirish kontraktini olib chiqish kontrakti bilan, shuningdek sotib olish kontraktini sotish kontrakti bilan oʻzaro bogʻliq holda nazorat qilish tartibi joriy etiladi.
Olib kirish kontrakti boʻyicha tovarlarni respublikaga olib kirish va bojхona ombori, erkin ombor, erkin bojхona zonasi, bojхona hududida qayta ishlash bojхona rejimlariga rasmiylashtirish, shuningdek ular uchun toʻlangan pul mablagʻlarini qaytarish muddati ushbu kontraktlar boʻyicha toʻlov amalga oshirilgan kundan boshlab 180 kundan ortiq boʻlmasligi lozim.
Shuningdek belgilanishicha, olib chiqish kontrakti boʻyicha tushum tushishi yoki tovarlarni qayta olib kirish muddati tovarlar «reeksport» bojхona rejimiga rasmiylashtirilgan sanadan boshlab 180 kundan oshib ketmasligi lozim.
Qaror bilan Tashqi savdo operatsiyalari amalga oshirilishi monitoringini olib borish va nazorat qilish tartibi toʻgʻrisidagi nizomga oʻzgartirish va qoʻshimchalar kiritildi.
Xususan, tashqi savdo kontrakt iva invoyslarda toʻlov amalga oshiriladigan valyuta tomonlar oʻrtasidagi kelishuvga asosan (ilgari хorijiy valyutada) belgilanadi.
Shuningdek tashqi savdo operatsiyalarini ifodalaydigan ikki raqamdan iborat kontraktlar klassifikatsiyasi kiritildi:
- 16 – import kontrakti;
- 17 – eksport kontrakti;
- 18 – sotib olish kontrakti;
- 19 – sotish kontrakti.
Hujjat Qonun hujjatlari ma’lumotlari milliy bazasida e’lon qilingan va 9.07.2021 yildan kuchga kirdi.
Lola Abduazimova.
