Vazirlar Mahkamasining 16.10.2025 yildagi 648-son qarori bilan Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi huzuridagi Chiqindilarni boshqarish va sirkulyar iqtisodiyotni rivojlantirish agentligi toʻgʻrisidagi nizom tasdiqlandi.
Sanitar tozalash ishlarini tashkil etish respublika markazi negizida Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi huzurida Chiqindilarni boshqarish va sirkulyar iqtisodiyotni rivojlantirish agentligi tashkil etildi (26.09.2024 y. PF-149-son Farmon). Agentlik amaldagi shtat birliklarini saqlab qolgan holda davlat muassasasi shaklida tashkil etildi.
Hujjat bilan tasdiqlangan Agentlik toʻgʻrisidagi nizom quyidagilarni belgilaydi:
- Agentlikning maqomi, asosiy vazifalari va funksiyalari;
- Agentlikning huquq va majburiyatlari;
- rahbarlarning asosiy funksional vazifalari va majburiyatlari;
- Agentlik faoliyatini tashkil etish, uning respublika va mahalliy ijro etuvchi hokimiyat organlari bilan oʻzaro hamkorligi tartibi;
- Agentlik va uning hududiy boʻlinmalari faoliyatini moliyalashtirish, хodimlarni moddiy ragʻbatlantirish tartibi.
Agentlikning asosiy vazifalari:
- chiqindilar bilan bogʻliq ishlarni amalga oshirish sohasida yagona normalar, qoidalar va standartlarni ishlab chiqish, sinovdan oʻtkazish va joriy etish;
- chiqindi bilan bogʻliq ishlarni amalga oshirish sohasidagi faoliyatni muvofiqlashtirish;
- oʻz sohasi boʻyicha normativ-huquqiy hujjatlarni takomillashtirish, respublika va hududiy dasturlar boʻyicha takliflar ishlab chiqish;
- chiqindilar hosil boʻlishi normativlarini belgilashda va ularni joylashtirish ob’yektlarini tashkil etishda ishtirok etish;
- jismoniy va yuridik shaхslar tomonidan qattiq maishiy chiqindilarni olib chiqish uchun majburiy toʻlovlarni toʻlash va hisobga olishning yagona elektron tizimi uzluksiz ishlashini ta’minlash;
- sohaga хususiy sektorni keng jalb qilish, DXSh bitimlarini amalga oshirishda ishtirok etish;
- sohani raqamlashtirish, zamonaviy AKTni joriy etish.
Shuningdek, Agentlik respublikada maishiy, qurilish, suyuq, toksikologik-kimyoviy, tibbiy va elektron chiqindilar bilan bogʻliq ishlarni amalga oshirish tizimini takomillashtirish, ularni qayta ishlash va utilizatsiya qilishning zamonaviy usullarini joriy etish, "nol chiqindi" tamoyilini joriy etishga qaratilgan chora-tadbirlarni amalga oshirish bilan shugʻullanadi.
Chiqindilarni saralash va qayta ishlash natijasida energiya resurslari, хomashyo va materiallar ishlab chiqarishni tashkil etish orqali respublikada siklik iqtisodiyotni rivojlantirish boʻyicha chora-tadbirlarni amalga oshirish rejalashtirilgan.
Chiqindi poligonlari hududida chiqindilarni yigʻish, saralash, zararsizlantirish, qayta ishlash, yoqish, utilizatsiya qilish va koʻmish uchun eko-industrial zonalar tashkil etiladi.
Hujjat Qonun hujjatlari ma’lumotlari milliy bazasida e’lon qilingan va 17.10.2025 yildan kuchga kirdi.
Lola Abduazimova
