Vazirlar Mahkamasining 6.05.2020 yildagi «Chiroqchi» erkin iqtisodiy zonasi faoliyatini tashkil etish chora-tadbirlari toʻgʻrisida»gi 267-son qarori bilan hududlar chegaralari belgilandi, direksiya tuzilmasi, uning ustavi va faoliyatini moliyalashtirish manbalari tasdiqlandi.
EIZ Prezidentning 13.09.2019 yildagi «Chiroqchi» erkin iqtisodiy zonasini tashkil etish toʻgʻrisida»gi PF-5825-son Farmoniga muvofiq Qashqadaryo viloyatida tashkil etilgan.
Yangi hujjat bilan kelgusi yillarda oʻzini oʻzi moliyalashtirishga oʻtkazish sharti bilan 2020-2021 yillar davrida EIZ direksiyasini saqlash va zarur infratuzilmani rivojlantirish uchun respublika byudjetidan va Qashqadaryo viloyati byudjetidan mablagʻlar ajratilishi tartibga solinadi.
Xususan, «Chiroqchi» EIZ direksiyasi» DUKning ustav fondini shakllantirishga 1 mlrd soʻm ajratiladi. Ikki oy mobaynida Qurilish vazirligi hamda Investitsiyalar va tashqi savdo vazirligi bilan birgalikda «Chiroqchi» erkin iqtisodiy zonasining bosh rejasi ishlab chiqiladi va tasdiqlanadi.
Hujjat Qonun hujjatlari ma’lumotlari milliy bazasida e’lon qilingan va 6.05.2020 yildan kuchga kirdi.
Lola Abduazimova.
