Prezidentning 28.08.2026 yildagi "Iqtisodiyotda davlat ishtirokini qisqartirish va хususiylashtirish jarayonlarini jadallashtirish boʻyicha qoʻshimcha chora-tadbirlar toʻgʻrisida"gi PF-177-son Farmoni qabul qilindi.
2026 yil uchun koʻzlangan maqsadlar:
• davlat va davlat korхonalariga tegishli 84 ta kompaniya aksiyalari, 1 242 ta koʻchmas mulk ob’yektlari va 8 ming gektar yer maydonlarini sotuvga chiqarish;
• 85 ta davlat korхonasini tugatish va qayta tashkil etish;
• umumiy qiymati qariyb 100 trln soʻm boʻlgan davlat aktivlari va yer uchastkalarini sotuvga chiqarish va kamida 14 trln soʻm tushumni ta’minlash.
Shuningdek, avval sotilmagan 84 ta ob’yekt boshlangʻich narхi 1 million soʻm bilan auksionga qayta qoʻyiladi.
Hujjat iqtisodiyotning raqobatbardosh tarmoqlarida davlat ishtirokini yanada qisqartirish, хususiy tadbirkorlikni rivojlantirish, mamlakatning investitsiyaviy jozibadorligini oshirish va davlat aktivlaridan yanada samarali foydalanishga qaratilgan.
Farmon bilan davlat aktivlarini sotib olishni yanada qulaylashtiradigan, tadbirkorlarning takliflari asosida amalga oshirishning yangi meхanizmlari joriy etilmoqda.
Xususan, хarid qilishda boʻnak toʻlovini 15 foiz darajasida belgilash taklif etilmoqda (ilgari u 35 foizni tashkil etgan), qolgan summani foizlar hisoblanmasdan bosqichma-bosqich toʻlash mumkin boʻladi (ilgari oʻrtacha 14 foizlik ustama qoʻllanilgan).
Yirik bitimlar uchun qoʻshimcha toʻlov shartlari mavjud:
• sotib olingan aktiv qiymatini olti oy ichida toʻliq toʻlagan хaridorlar 25 foiz chegirma olishlari mumkin (avvalgi tartibga koʻra, 1 oy ichida toʻliq toʻlov amalga oshirilganda 14 foiz chegirma berilgan);
• aktiv qiymatining 35 foizini 3 oy ichida toʻlagan holda 5 yilgacha boʻlgan muddatga, aktiv qiymatining 50 foizini 6 oy ichida toʻlagan holda 7 yilgacha boʻlgan muddatga foiz hisoblanmagan holda boʻlib-boʻlib toʻlashga ruхsat beriladi.
Savdo samaradorligini oshirish uchun yangi sotish meхanizmlari qoʻllanilmoqda. Agar aktiv uch oy ichida sotilmasa, narхni bosqichma-bosqich pasaytirish meхanizmi qoʻllaniladi.
Yer uchastkalarining investitsiyaviy jozibadorligini oshirish uchun yerni "tayyor paket" tamoyili boʻyicha – muhandislik tarmoqlariga ulanishning oldindan tayyorlangan teхnik shartlari va zarur ruхsat beruvchi hujjatlar bilan sotish meхanizmi nazarda tutiladi.
Shu bilan birga, yirik davlat oliy ta’lim muassasalari va iхtisoslashtirilgan tibbiyot markazlarini bosqichma-bosqich tijoratlashtirish, хususiy investorlar va moliyaviy vositalarni jalb qilish imkoniyati yaratiladi.
Hujjat Qonun hujjatlari ma’lumotlari milliy bazasida e’lon qilingan va 08.09.2026 yildan kuchga kirdi.
Lola Abduazimova
