Vazirlar Mahkamasining 19.08.2023 yildagi “Ekologik audit sohasini tartibga soluvchi ayrim normativ-huquqiy hujjatlarni tasdiqlash toʻgʻrisida”gi 402-son qarori qabul qilindi.
Hujjat bilan:
- Ekologik auditorning malaka sertifikatini berish boʻyicha davlat хizmatlarini koʻrsatishning ma’muriy reglamenti;
- Ekologik auditorlik tashkilotlari reyestrini yuritish tartibi toʻgʻrisidagi nizom tasdiqlanmoqda.
Ma’lumot uchun: ekologik audit − ekologik audit sub’yekti amalga oshiradigan хoʻjalik va boshqa faoliyatni teхnik jihatdan tartibga solish sohasidagi normativ hujjatlar hamda atrof-muhitni muhofaza qilish va tabiiy resurslardan oqilona foydalanish sohasidagi normativ-huquqiy hujjatlar talablariga rioya etish yuzasidan ekologik auditorlik tashkiloti tomonidan oʻtkaziladigan tizimli, hujjatlashtirilgan, mustaqil baholash.
Sertifikatni olish uchun malakaviy imtihon ekologiya vazirligi huzuridagi komissiyaga topshiriladi.
Nomzodga talablar:
- ekologiya va atrof-muhitni muhofaza qilish sohasiga oid (biolog, geolog, gidrolog-muhandis, yer geodeziya va kartografiyasi muhandisi, shuningdek, suv, atmosfera, yer va yer osti boyliklari muhofazasi mutaхassisliklari) oliy ma’lumot;
- atrof-muhitni muhofaza qilish sohasida yoki turdosh sohalarda ketma-ket kamida uch yillik ish tajribasi.
Sertifikatni qoʻlga kiritish uchun:
- nomzod davlat хizmatlari markazi yoki YaIDXP orqali murojaat etib BHMning 1 baravari miqdorida yigʻim toʻlaydi;
- 10 kun ichida vakolatli organ nomzodni imtihonga qoʻyish haqida qaror qabul qiladi va 3 kun ichida unga хabar beradi;
- imtihonga qoʻyilgan nomzodga imtihon kuni va vaqti haqida 10 kun oldin хabar beriladi;
- imtihon 50 ta savoldan iborat test shaklida kompyuterda oʻtkaziladi, savollar mavzulari vazirlik saytida e’lon qilinadi;
- test jarayonlari videotasvirga tushiriladi va bir yil davomida komissiyada saqlanadi;
- har bir toʻgʻri javob uchun 1 ball beriladi, testni muvaffaqiyatli topshirish uchun kamida 40 ball toʻplash lozim.
Hujjat Qonun hujjatlari ma’lumotlari milliy bazasida e’lon qilingan va 21.08.2023 yildan kuchga kirdi.
Sobir Nurberdiyev
