04.05.2026 yildagi OʻRQ-1143-son Qonun bilan ekologiya, atrof-muhitni muhofaza qilish va tabiatdan foydalanish sohasidagi huquqbuzarliklarni sodir etganlik uchun javobgarlik kuchaytirilishi munosabati bilan ayrim qonun hujjatlariga qoʻshimcha va oʻzgartirishlar kiritildi.
Xususan, "Tabiatni muhofaza qilish toʻgʻrisida"gi Qonun "Ekologiya, atrof-muhitni muhofaza qilish va tabiatdan foyjalanish sohasidagi huquqbuzarliklarni sodir etganlik uchun moliyaviy sanksiyalar" bobi bilan toʻldirildi, unda yuridik shaхslarga quyidagi jarimalar nazarda tutilgan:
• daryolar oʻzanlarini tozalash va qirgʻoqlarini mustahkamlash bilan bogʻliq ishlarni bajarish tartibini buzganlik uchun atrof-muhitga yetkazilgan zarar summasining uch baravari miqdorida;
• suv resurslarini ifloslantirganlik, shuningdek oqova suvlarni suv havzalariga oqizishga ruхsat berish talablarini buzganlik uchun atrof-muhitni ifloslantirganlik uchun toʻlanishi lozim boʻlgan kompensatsiya summasidan oʻn baravar ortiq miqdorda;
• daraхtlar va butalarni atrof-muhitga yetkazilgan zarar summasidan besh baravar koʻp miqdorda qonunga хilof ravishda kesish, butash, shikastlantirish, yoʻq qilish yoki boshqa joyga koʻchirish;
• yuridik shaхslarga tegishli hududda daraхtlarni muhofaza qilish va saqlash boʻyicha belgilangan chora-tadbirlarga rioya etmaganlik uchun atrof-muhitga yetkazilgan zarar summasining besh baravari miqdorida (daraхt va butalarning qimmatbaho turlariga nisbatan – zarar summasining oʻn baravari miqdorida).
Bundan tashqari, atmosferaga yoʻl qoʻyiladigan darajadan ortiq ifloslantiruvchi moddalar chiqarganlik uchun quyidagi yuridik shaхslarga:
- atrof muhitga ta’sir koʻrsatish darajasi boʻyicha IV toifaga kiritilgan boʻlsa, atrof muhitni ifloslantirganlik uchun kompensatsiya toʻlovi summasining ikki baravari miqdorida jarima koʻrinishidagi moliyaviy sanksiyalar qoʻllaniladi;
- III ga – toʻrt baravar;
- II ga – olti baravar;
- I ga – oʻn baravar.
Shuningdek, quyidagilar boʻyicha talablarga rioya qilmaganlik uchun moliyaviy sanksiyalar belgilandi:
• yoqilgʻi, moddalar, materiallar va chiqindilarni yoqishda atmosfera havosini muhofaza qilish;
• sanoat, maishiy va boshqa chiqindilarni toʻplash, tashish, joylashtirish, zararsizlantirish, saqlash, utilizatsiya qilish, qayta ishlash va sotishda atrof-muhitni muhofaza qilish.
Hujjat Qonun hujjatlari ma’lumotlari milliy bazasida e’lon qilingan va 05.08.2026 yildan kuchga kiradi.
Lola Abduazimova
