Vazirlar Mahkamasining 31.01.2023 yildagi “Umumiy oʻrta ta’lim toʻgʻrisidagi elektron shahodatnomaning davlat namunasini tasdiqlash haqida”gi 44-son qarori qabul qilindi.
Hujjat bilan umumiy oʻrta ta’lim toʻgʻrisidagi elektron shahodatnomanining davlat namunasi, shuningdek elektron shahodatnomani shakllantirish va berish tartibi tasdiqlanmoqda. Endilikda har yili:
- 1 dekabrga qadar maktab ma’muriyati bitiruvchilar haqida ma’lumotni elektron dasturga kiritishadi (ma’lumotlar 25 mayga qadar yangilanishi va oʻzgartirilishi mumkin);
- 30 mayga qadar tuman ta’lim boʻlimi kiritilgan ma’lumotlarni tekshirib, tasdiqlaydi;
- 15 iyunga qadar maktab pedagogik kengashi bitiruvchilarga shahodatnoma berish toʻgʻrisida qaror qabul qiladi;
- Maktabgacha va maktab ta’lim vazirligi elektron shahodatnomalar uchun seriya va tartib raqamini ajratadi;
- 20 iyunga qadar maktab ma’muriyati yakuniy baholarni elektron tizimga kiritadi, shundan soʻng “Elektron shahodatnoma” tizimida QR-kod tasviri tushirilgan va bitiruvchi tomonidan yuklab olinishi mumkin boʻlgan shahodatnoma shakllantiriladi.
Hujjat Qonunchilik ma’lumotlari milliy bazasida e’lon qilingan va 01.02.2023 yildan kuchga kirdi.
Sobir Nurberdiyev.