Vazirlar Mahkamasining 24.06.2025 yildagi «Turizm ob’yektlari hamda joylashtirish vositalarida atrof-muhitga salbiy ta’siri kamaytirilgan mahsulotlardan foydalanish va ekologik talablarga muvofiq koʻrsatiladigan хizmatlarni ragʻbatlantirish chora-tadbirlari toʻgʻrisida» 385-son qarori qabul qilindi.
2025 yildan boshlab har yili noyabrda «Eng namunali yashil turizm ob’yekti» tanlovi oʻtkaziladi. Hujjat bilan tanlovni oʻtkazish tartibi toʻgʻrisidagi Nizom tasdiqlandi.
Tanlovning asosiy vazifalari:
- turizm ob’yektlarida plastik mahsulotlar va chiqindilardan foydalanishni kamaytirish;
- turizm ob’yektlarida bir martalik plastikdan ekologik jihatdan toza (bioparchalanuvchi) mahsulotlarga oʻtish va ulardan foydalanishga koʻmaklashish;
- teхnik tartibga solish sohasidagi ekologik talablar va ekologik mezonlarga muvofiqlikka erishish;
- turizm ob’yektlarida atrof-muhitni va ekologiyani muhofaza qilishga qaratilgan innovatsion yechimlar va istiqbolli tashabbuslarni qoʻllab-quvvatlash.
Tanlov hududiy saralash va respublika yakuniy bosqichlaridan iborat.
Tanlovning respublika yakuniy bosqichi gʻoliblariga bir martalik pul mukofoti beriladi:
- 1-oʻrin – BHMning 150 baravari;
- 2-oʻrin – BHMning 100 baravari;
- 3-oʻrin – BHMning 50 baravari.
Hujjat Qonun hujjatlari ma’lumotlari milliy bazasida e’lon qilingan va 26.06.2025 yildan kuchga kirdi.
Lola Abduazimova
