18.08.2023 yildagi OʻRQ-863-son Qonun bilan “Volontyorlik faoliyati toʻgʻrisida”gi Qonunga oʻzgartirish va qoʻshimchalar kiritildi. Qonun Qonunchilik palatasi tomonidan 2023 yil 16 mayda qabul qilingan va Senat tomonidan 2023 yil 5 avgustda ma’qullangan.
Kiritilgan qoʻshimchalarga asosan Yoshlar siyosati va sport vazirligi huzuridagi Yoshlar ishlari agentligi volontyorlik faoliyati sohasidagi maхsus vakolatli davlat organi hisoblanadi.
Agentlik oldiga quyidagi vazifalar qoʻyildi:
- volontyorlik faoliyati sohasida davlat siyosatining amalga oshirilishida ishtirok etish;
- normativ-huquqiy hujjatlar loyihalarini ishlab chiqish va amalga oshirish;
- qonun hujjatlarini takomillashtirish boʻyicha takliflar kiritish.
Shuningdek, Qonun bilan respublika ijro etuvchi hokimiyat organlarining volontyorlik faoliyati sohasidagi vakolatlari belgilandi.
Shu bilan birga, mahalliy davlat hokimiyati organlariga ham normativ-huquqiy hujjatlar loyihalarini ishlab chiqish, davlat maqsadli dasturlarini amalga oshirish boʻyicha vakolatlar berildi.
Qonun Qonun hujjatlari ma’lumotlari milliy bazasida e’lon qilingan va 19.08.2023 yildan kuchga kirdi.
Lola Abduazimova
